ಮನ್ಸನ ಕಾರ್ದ ಅಡಿಯೇ ಪಾದ. ಬಲ ಊರ್ದು ಉಂತೊಡ್ಡ ನಡಪೊಡ್ಡ ಪಾದ ಬೋಡೇ ಬೋಡು. ನಮ್ಮ ಮಂಡೆ ಆಕಾಸ ತೂಂಡ ಪಾದ ಪಾತಾಲ ತೂಪುಂಡು. ಪಾದೆ ಪಂಡ ಮಾತೆರೆಗ್ಲಾ ತೆರಿದಿಲೆಕೋ ನೆಲ ಪೂರ್ತಿ ಅಗಲೊಡು ಜೆತೊಂದು ಉಪ್ಪುನ ಕಲ್ಲ್. ಪಜೆ ಪಾಡಿ ಲೆಕೊ ಪಜೆ ಬುಡ್ಪಾಯಿ ಲೆಕೊ ಉಪ್ಪುನ ಮಲ್ಲ ಕಲ್ಲ್. ನಮಡ್ದ್ ದುಂಬುದ ಮುಡಾಯಿದ ತುಲು ಪೆರಿಯಾಕುಲು ಬಾಸೆ ಪುಟ್ಟುನ ಕಾಲೊಡು ಕಾರ್ದ ಅಡಿಕ್ “ಪಾದ” ಪಂದ್ ಪುದರ್ ದೀಯೆರ್. ಅಂಚೆನೆ ಒಂಜಾತ್ ಜಾಗೆಡ್ ಕಾರ್ ಬುಡ್ದುಜೆಯಿದಿನ ಕಲ್ಲುಗು “ಪಾದೆ”ಪಂದ್ ಪುದರ್ ದೀಯೆರ್. ಈ ರಡ್ಡ್ ಸಬ್ದೊಲೆನ್ ಮುಟ್ಟ ಮುಟ್ಟ ಕಂತ್ ದೀಯೆರ್. ತೂವರೆ ಈ ಪಾದೊಲು ಬೊಕ್ಕ ಜೆಯಿದಿನ ಕಲ್ಲ್ ಒಂಜೇ ಲೆಕೊ ಇಜ್ಜಿ. ಬೊಕ ದಾಯೆ ಈ ಪುದರ್ಲೆನ್ ದೀಯೆರ್?
ನಮ್ಮ ಪೆರಿಯಾಕುಲು ನಮಡ್ದು ದಿಂಜ ದಿಂಜ ಉಸಾರ್ ಇತ್ತೆರ್. ಎದುರುಡು ಒಂಜಿ ಪುದರ್ ದೀದ್ ಉಲಾಯಿಡ್ದ್ ಬೇತೆನೆ ಒಂಜಿ ಅರ್ತ ದೀದ್ ತುಲು ಪದೊಲೆನ್ ಪುಟ್ಟದೆರ್. ಪುದರ್ಲಡೇ ನಂಕ್ ಜಾಗ್ರತೆ ಪುಟ್ಟದೆರ್. ಆಂಡ ಐತ್ತ ಆ ಸಬ್ದೊಲೆನ ಅರ್ತೊನು ನಮ ತೆರಿಯೊನೊರೆ ಪೋತುಜಾ.ಇತ್ತೆ ಐತ್ತ ಉಲಾಯಿ ಪೋದು ತೂಕ ದಾಯೆ ಈ ಸಬ್ದೊಲೆನ್ ಒಂಜಾತ್ ಮುಟ್ಟ ಕಂತುದು ದೀತೆರ್ ಪಂದ್.
“ತಾದಿ ತೂದು ನಡಪುಲ”ಪನ್ಪಿ ಪಾತೆರೊ ಉಂಡು. ಪಂಡ ಪಾದ ನೆಲಕ್ಕ್ ದೀನಗ ನೆಲ ಎಂಚ ಉಂಡು ಪಂದ್ ತೂದು ಎಜ್ಜೆ ದೀವೊಡು.ಅಂಚೆನೆ ಈ ಪಾದೆ ಪನ್ಪಿ ಕಲ್ಲುಡು ಎಜ್ಜೆ ದೀನಗ ಪಾದೆ ಎಂಚ ಉಂಡು ಪಂದ್ ತೆರಿಯೊನೊಡು.ಈ ಕಲ್ಲುಡು ನಡಪುನಗ ಮೆಯಿ ಮಾಲುನಾಗ ಪತೊನೊರೆ ದೈ ಮರೊಕುಲು ಇಜ್ಜಿ. ಮನ್ನುದ ತಾದಿಡ್ ನಡಪುನಗ ಪತೊನೊರೆ ಉಂದು ತಿಕ್ಕುಂಡು. ತಸ್ಮೋಸೊಡು ಬೂರುಂಡ ಆತ್ ಪೆಟ್ಟಾವಂದ್.ಆಂಡ ಈ ಪಾದೆಡ್ ಬೂರುಂಡ ಅಂಚ ಅತ್ತ್.ಪೆಟ್ಟಾಪುನನೇ ಎಚ್ಚ.
ಅರೆಗಲೊಡು ಪಾದೆ ಬೆಚ್ಚಾದ್ ಸುಡುಪುಂಡು.ನಂಕ್ ಪಾದ ದೀವರಾಂದುನ ಬೆಚ್ಚ ಉಪ್ಪುಂಡು.ಅಂಚ ಪಾದೆ ತೂದು ಪಾದ ದೀವೊಡು. ಅವತ್ತಂದೆ ಅರಗಲೊಡು ಪಾದೆ ಪನ್ಪಿ ಕಲ್ಲ್ ಪಿದಾಯಿದ ಸೂರ್ಯನ ದೊಂಬುದ ಬೆಚ್ಚ ಬೆಚ್ಚ ಉಸ್ನೊನು ಒಯಿತೊಂದು ಉಪ್ಪುಂಡು. ಈ ಪೊರ್ತುಗು ಪಾದೆಡ್ ನಡಪುನಗ ನನಾತ್ ಜಾಗ್ರತೆ ಬೋಡು. ಬೆಚ್ಚೊಡು ನಡಪರೆ ಆಪುಜಿ. ಅಂಚ ಪಾದ ಊರುನಾಗ ಪಾದೆಡ್ ಜಾಗ್ರತೆ ಬೋಡು.
ತುಲುನಾಡ್ಡ್ ರಡ್ಡೇ ಕಾಲ.ಅವು ಅರಗಲ ಬೊಕ್ಕ ಮರಿಯಲ.ಎಡ್ಮ ತಿಂಗೊಲು ಬುಡಂದೆ ಬರ್ಸ ಬರೊಂ ದು ಇತ್ತುಂಡು.ಪನಿ ಕಡಿಯಂದಿನ ಬರ್ಸಗೆ.ಏತೋ ದಿನ ಸೂರಿಯನ್ ತೂವರೆ ಇತ್ತಿಜಿಗೆ. ನೆಲ ಕುರಿದ್ ಕುರ್ತೆಲ್ ಕುರ್ತೆಲ್ ಆವೊಂದು ಇತ್ತ್ಂಡ್. ಇಂಚ ಉಪ್ಪುನಗ ಪಾದೆಲಾ ಪಾಮಜಿ ಪತ್ತುದು ಜಾರೊಂದು ಉಪ್ಪುಂಡು. ಮರಿಯಲೊಡು ಪಾದೆಡ್ ನಡಪು ಲೆಕೋ ಇಜ್ಜಿ.ಪಾದೆಡ್ ಪಾದ ದೀನಗ ಜಾಗ್ರತೆ ಪಂದ್ ಪಾದ – ಪಾದೆ ಪಂದ್ ಪುದರ್ ದೀತೆರ್.ಉಂದು ಪಾದೆ .ಪಾದ ದೀನಗ ಜಾಗ್ರತೆ ಉಪ್ಪಡ್ ಪಂತೆರ್.
ಐ.ಕೆ.ಗೋವಿಂದ ಭಂಡಾರಿ, ಕಾರ್ಕಳ
(ನಿವೃತ್ತ ವಿಜಯಾ ಬ್ಯಾಂಕ್ ಮ್ಯಾನೇಜರ್)
