ಎನ್ನ ಊರು ಕೊಳಕ್ಕೆ ಎಡ್ತೂರು. ಈ ಊರುದ ಕುಡೊಂಜಿ ಪುದರೇ ಕೊಳಕ್ಕೆ ಇರ್ವತ್ತೂರು. ಮೂಲು “ಮಂಗಿಲ ಕಲ್ಲ್” ಪಂದ್ ಲೆಪ್ಪುನ ಒಂಜಿ ಮಲ್ಲ ಪಾದೆ ಕಲ್ಲ್ ಉಂಡು.ಈ ಪಾದೆಗ್ ದಾಯೆ “ಮಂಗಿಲ ಕಲ್ಲ್” ಪಂದ್ ಲೆತ್ತೆರ್? ಈ ಪುದರ್ ಎಂಚ ಬತ್ತುಂಡು? ಪನ್ಪುನ ಇಸಯೊ ಎನ್ನ್ ತರೆಕ್ಕ್ ಅಡರ್ದ್ ಪೋಂಡು. ಎನ್ನಿಯರೆಗ್ ಸುರು ಮಲ್ತೆ.ಎನ್ನ ಎಲ್ಯ ಪ್ರಾಯೊದ ದಿನೊಕುಲು ಎದುರು ಬರಿಯರೆ ಸುರು ಆಂಡ್.ಆ ಕಾಲೊಡು ಮಂಗಿಲ ಕಲ್ಲುದ ಸುತ್ತೊರ್ಮೆ ಕರಿ ಮುಸುಂಟುದ ಮುಜ್ಜುಲೆನ ಪಟ್ಲಾಂ ಇತ್ತ್ಂಡ್. ಅಂಚ ಈ ಮುಜ್ಜುಲೆಡ್ದಾವರ ಈ ಪಾದೆ ಕಲ್ಲುಗು “ಮಂಗಿಲ ಕಲ್ಲ್ “ಪನ್ಪುನ ಪುದರ್ ಬೈದ್ಂಡ್ ಪನ್ಪುನ ಸುರುತ್ತ ತೂಪಾಟಿಕೆಡ್ ಒಂಜಿ ಕಡೆಟ್ಟ್ ಪಂತೆ ಬೊಕ್ಕ ಬರೆತ್ತೆ.
ಒಂತೆ ವರ್ಸೊಡ್ದು ಬೊಕ್ಕ ಬೇತೆ ಊರುಡುಲಾ ಮಂಗಿಲ ಕಲ್ಲ್ , ಮಂಗಲ ಕಲ್ಲ್ , ಮಂಗಿಲ ಪಾದೆ , ಮಂಗಲ ಪಾದೆ ಪಂದ್ ಲೆಪ್ಪುನ ಕಲ್ಲುಲು ಉಂಡು ಪಂದ್ ತೆರಿಯೊಂಡೆ. ಎನ್ನ ಸುರುತ್ತ ತೂಪಾಟಿಕೆದ ಬರವು ತಪ್ಪು ಪಂದ್ ಎನ್ನ ಮಂಡೆಗ್ ತೋಜಿದ್ ಬತ್ತ್ಂಡ್. ಮುಜ್ಜುಲು ಪಂಡ ಅವು ಕೋತಿ ಮಂಗನಕುಲು ಅತ್ತ್. ಅತ್ತವಂದೆ ಮುಜ್ಜು ಮಂಗೆರ್ಲುಕಲ್ಲ್ ಪಾದೆಡ್ ಕುಲ್ಲುಜ.ಐಕುಲು ಮರಟ್ಲೆಡ್ ಕುಲ್ಲುನ. ಅಂದ್ ಈ ಮಂಗಿಲ ಕಲ್ಲುದ ಸುತ್ತೊರ್ಮೆ ಬೇತೆ ಬೇತೆ ಬಗೆತ್ತ ಮರಕುಲು ಇತ್ತ. ಕುಕ್ಕು ಪೆಲಕಾಯಿ,ಪೆಜಕಾಯಿ, ಪೆರಂಗಾಯಿ,ಚಲ್ಲಂಗಾಯಿ,ತೇರೆದ ಮರೊಕುಲು, ಮುಲ್ಲುದ ತಂಪೇ ಮರ,ನಾನಿಲ್,ನೇರೊಲು ,ಕುಂಟಲ್ ತಾರೊಲು,ಗೋಲಿ ಇಂಚ ಮರೊಕುಲು ಇತ್ತ.ಐತ್ತ ತಪ್ಪು ಪಂರ್ದ್ ತಿಂದ್ ಮುಜ್ಜುಲು ಈ ಎಡ್ತೂರ್ದ ಮಂಗಿಲ ಕಲ್ಲುಡು ತೋಜೊಂದು ಇತ್ತ.”ಮಂಗಿಲ”ಪನ್ಪುನ ಸಬ್ದೊ ಮಂಗೆರ್ಲೆಡ್ದ್ ಬೈದಿಜಿ ಪನ್ಪುನ ಗೇನ ಎನ್ನ ಮಂಡೆದ ಬೊಂಡುಗು ತೆರಿಂಡ್.
“ಮಂಗಿಲ” ಪನ್ಪಿ ಸಬ್ದೊ ಒವ್ವು ಬಾಸೆಡ್ದ್ ಬತ್ತಿನವು ಪಂದ್ ನಾಡರೆ ಸುರು ಮಲ್ತೆ. ತುಲು ಬಾಸೆಡ್ ಗಲಸುನ ತೋಜಿಂಡ್.”ಇನಿ ಒಂಜಿ ಮಂಗಿಲ ಉಂಡು, ಆಯಗ್ ಮಂಗಿಲ ಆತ್ಂಡ್” ಪನ್ಪುನ ಪಾತೆರೊ ತುಲುನಾಡ್ಡ್ ಉಂಡು.ಅಂಚೆನೆ ತುಲುನಾಡ್ಡ್ ಉಪ್ಪುನ ಬ್ಯಾರ್ಲು ಪನ್ಪಿನ ಜಾತಿದಕುಲು ಎಚ್ಚಾದ್ ಗಲಸುನ ಈ ಸಬ್ದೊನು ತೆರಿಯೊಂಡೆ.”ಮಂಗಿಲ”ಪಂಡ “ಮದ್ಮೆ” ಪಂದ್ ತೆರಿಯೊಂಡೆ. ಈ ಪದೊ ದ್ರಾವಿಡೆರೆನ ಬಾಸೆ ಪಂದ್ ಗೊತ್ತಾಂಡ್.”ಮಂಗಿಲ”ಪನ್ಪಿನವು ಮೂಲ ತುಲು ಬಾಸೆದ ಪದ ಆದುಂಡು.”ಮದ್ಮೆ” ಪನ್ಪಿನವು ಅವು ಕನ್ನಡ ಬಾಸೆದ “ಮದುವೆ” ಸಬ್ದೊಡ್ದು ಬೊಕ್ಕದ ಕಾಲೊಡು ಪುಟ್ಟಿನವು ಪಂದ್ ಅರ್ತ ಮಲ್ತೊಂಡೆ. “ಮಂಗಿಲ” ಸಬ್ದೊನು ಅವ್ವೇ ಅರ್ತೊಡು ಕೊಡಗುದ ಜನಕುಲು “ಮಂಗಲಾ”ಪಂದ್ ಲೆಪ್ಪುವೆರ್.ಮಲಿಯಾಲಿ ಬಾಸೆಡ್ ಅವೆನ್ “ಮಂಗಲಂ” ಪನ್ಪೆರ್. ತಮಿಲ್,ಕನ್ನಡ ,ತೆಲುಗು ಬಾಸೆಲೆಡ್ ಎಡ್ಡೆ ಎಡ್ಡೆ ಲೇಸ್ ಪಂದ್ ಪನ್ಪುಂಡು.
“ಮಂಗಿಲ” ಪಂಡ ಮದ್ಮೆ ಪಂದ್ ಗೊತ್ತಾಂಡ್. ರಡ್ಡ್ ಮನಸುಲೆನ್ ಒಟ್ಟು ಮಲ್ಪುನನೇ ಮಂಗಿಲ. ಆನ್ ಬೊಕ್ಕ ಪೊನ್ನು ಪನ್ಪಿ ಮಂಗು(ಮುಗ್ಧ)ಲೆನ್ ಇಲ(ಇಲ್ಲ್) ದ ಉಲಾಯಿ ಪಾಡುನನೇ ಮಂಗಿಲ ಪಂದ್ ಅರ್ತಮಲ್ತೊಂಡೆ. ರಡ್ಡ್ ಉಡಲ್ ಸೇರ್ದ್ ಒಂಜಿ ಉಡಲ್ ಮಲ್ಪುನ ಲೇಸೇ ಮಂಗಿಲ.ಪೆರಿಯಾಕುಲು ಕುಟುಮ ಮಾತ ಸೇರ್ದ್ ನಡಪಾವುನ ಲೇಸೇ ಮದ್ಮೆ ಅತ್ತುಡ ಮಂಗಿಲ.ಮಂಗಿಲ ಅತ್ತುಡ ಬೇತೆ ಬೇತೆ ಎಡ್ಡೆ ಲೇಸು ಕಾರ್ಯಕ್ರಮೊಲೆನ್ ಮಂಗಲ ಪಂದ್ ಪನ್ಪುನ ಉಂಡು .ಎಡ್ತೂರ ಮಂಗಿಲ ಕಲ್ಲುಗು “ದಾರಡ ಕಲ್ಲು” ಪಂದ್ಲಾ ಲೆಪ್ಪುವೆರ್.”ದಾರೆದ” ಸಬ್ದೊನೇ “ದಾರಡ” ಪಂದ್ ಉಚ್ಚಾರ ಮಲ್ತಿನ ಮುಲ್ಪ ಗೊತ್ತಾಪುಂಡು. ಆನ್ ಬೊಕ್ಕ ಪೊನ್ನು ಮಂಗುಲೆಗ್ ದಾರೆ ಮೈತ್ ಕೊರ್ಪುನ ಸುಬ ಲೇಸೇ “ಮಂಗಲ” ಅತ್ತುಡಾ ಮಂಗಿಲ ಆದುಂಡು ಪಂದ್ ತೆರಿದ್ ಬರ್ಪುಂಡು. ಮುಲ್ಪ ಮಂಗು(ಮೆದು)+ ಅಲ(ನೀರ್)=ಮಂಗಲ ಪಂದ್ ಆಪುಂಡು.ಪಂಡ ದಾರೆ ಮೈತ್ ಕೊರ್ಪುನು.ಕೆಲವು ಕಡೆಟ್ ಮಂಗಿಲ ಕಲ್ಲುನು ಮಂಜಲ್ ಕಲ್ಲ್, ಮದ್ಮಲ್ ಕಲ್ಲ್ ಪಂದ್ಲಾ ತಿರ್ಗದ್ ಪಂತೆರ್.
ಎಡ್ತೂರ್ದ ಮಂಗಿಲ ಕಲ್ಲ್ ಪಂಡ “ಮದ್ಮೆದ ಕಲ್ಲ್” ಬೊಕ್ಕ ದಾರೆಡ|ದಾರಡ ಕಲ್ಲ್ ಪಂಡ “ದಾರೆದ ಕಲ್ಲ್” ಪಂದ್ ತೆರಿಯೊನೊಲಿ.ಅರ್ತ ಮಲ್ತೊನೊಲಿ.ಮುಲ್ಪದ ಜನಕುಲು ಪನ್ಪುನ ಉಂಡು. ದಾನೆ ಪಂಡ ಊರುದಕೊಡಮಂದಾಯೆ ಬೂತ ಸುರುಕ್ಕು ಈ ಮಂಗಿಲ ಕಲ್ಲ್ ಉಪ್ಪುನ ಎಪ್ಪರದ ಪಾದೆಗ್ ಬತ್ತೆ. ಬತ್ತುದು ಈ ಮಂಗಿಲ ಕಲ್ಲುಡು ಕುಲ್ಲುದು ಎಡ್ತೂರ್ದ ಪೊರ್ಲು ತೂಯೆ.ಸೀದಾ ಕೋರಂಜೆ ಗುತ್ತುಗು ಬತ್ತೆ ಪಂದ್.ಅವು ನಂಬುಗೆ ಮಾತ್ರ.ಊರುಗು ಕೊಡಮಂದಾಯೆ ಬರ್ಪು ನ ದುಂಬೇ ಎಪ್ಪರದ ಪಾದೆಡ್ ಈ ಮಂಗಿಲ ಕಲ್ಲುನು ಪಾಡ್ದೆರ್ ಐಡ್ದ್ ದುಂಬುದಕುಲು.ಮಂಗಿಲ ಆವೊಂದು ಇತ್ತ್ಂಡ್.
ಅಂದ್ “ಮಂಗಿಲ ಕಲ್ಲ್” ಪಂಡ ಮದ್ಮೆದ ಕಲ್ಲ್. ಈ ಕಲ್ಲ್ ಇಪ್ಪುನ ಎಪ್ಪರದ ಪಾದೆದ ಪುದರತ್ತ್.ಊರು ಡು ಇತ್ತಿನ ಎತ್ತ್ ತಗ್ಗ್ ದಾಂತಿನ ಅಗೇಲ ಜಾಗಿತ್ತಿನ ಪಾದೆಡ್ “ಮಂಗಿಲ ಕಲ್ಲ್” ಪಾಡ್ದೆರ್. ಉಂದೇ ಕಲ್ಲುಡು ಅವೆತೋ ಜನಕುಲೆನ ಮಂಗಿಲ ನಡದುಂಡು.ಉಂದೇ ಕಲ್ಲುಡು ರಡ್ಡ್ ಉಡಲುಲು ಒಂಜಾತ. ಆನಿದ ಕಾಲೊಗು ಈ ಕಲ್ಲೇ ಮದ್ಮೆದ ಕುಟ್ಸು ಅತ್ತುಡ ಗದ್ದಿಗೆ. ಪಾದೆನೇ ಮದ್ಮೆದ ಮಲ್ಲ ಚಾವಡಿ.ಇತ್ತೆದ ಮದ್ಮೆದ ಹಾಲ್.
ಆನಿದ ಕಾಲೊಡು ತುಲುನಾಡ್ಡ್ ಪಂಡ ಬೇತೆ ಊರುದ ಲೆಕೊ ಇತ್ತಿಜಿ.ಬೇತೆ ಊರುಗು ಮೂಜಿ ಕಾಲ ಇತ್ತ್ಂಡ ತುಲುನಾಡ್ಡ್ ರಡ್ಡೇ ಕಾಲ ಇತ್ತಿನಿ.ಅವೆ ಅರಗಲ ಮರಿಯಲ.ವರ್ಸ ಇಡೀ ಬರ್ಸಗೆ. ಇಪ್ಪರೆ ಕುಲ್ಲರೆ ಸರಿ ಆಯಿನ ಇಲ್ಲ್ ಇತ್ತಿಜಿ.ಗೋಡೆ ದಾಂತಿನ ಅರೆಮಡಲ್ ತಟ್ಟಿದ ಇಲ್ಲ್.ಪನೊಲಿ (ಪನಿ+ಒಲಿ) ಮಡಲ್ದ ಮಾಡ್.ಮನ್ನುದ ನೆಲ.ಬರ್ಸೊಗು ತೋರುನಇಲ್ಲ್.ನೆಲ ಪೂರ ಕಲ ಕಂಬುಲ(ಕೆಸರ್).ತುಲುಕಾಡ್ಡ್ ನಾಗನ್ ನಂಬುದು ಆಯನ ಮನ್ನುಡು ಕುಡುಅರಿ ದಕ್ಕುದು ತುಲುನಾಡ್ ಸಿಸ್ಟಿ ಆಂಡಲಾ ಉನರೆ ತಿನರೆ ಬಙನೇ ಇತ್ತ್ಂಡ್. ತುಲುನಾಡ್ಡ್ ಕೊಡಿಕಡೆಲಾ ಪಟ್ಲ (ಕೊಳ ಪ್ರದೇಶ)ಬೂಮಿಯೇ
ಇತ್ತ್ಂಡ್.ಈ ಸಂಕಟದ ಕಾಲೊಡು ಮಂಗಿಲ(ಮದ್ಮೆ) ದೆಪ್ಪುನ ಅತ್ತುಡ ಎಡ್ಡೆ ಲೇಸ್ ದೆಪ್ಪರೆ ಆನಿದ ನಮ್ಮ ಪಿರಿಯಾಕುಲು ನಾಡಿನ ಜಾಗೆನೇ ಪಾದೆ. ಐಟ್ ಪಾಡಿನ ಕಲ್ಲೇ “ಮಂಗಿಲ ಕಲ್ಲ್”. ಈ ಕಲ್ಲುಡು ಕಿರೆಂಚಿ ಇಜ್ಜಿ. ಕೆಸರ್ ಉಪ್ಪುಜಿ. ನೀರ್ ಜತ್ತ್ ಪೋಪುಂಡು.ಮಂಗಿಲ ಕಲ್ಲೇ ಮದ್ಮೆದ ಮಂಟಪ.
ಪಾದೆಡ್ “ಮಂಗಿಲ ಕಲ್ಲ್” ಪಾಡ್ದ್ ಮದ್ಮೆ,ಎಡ್ಡೆ ಲೇಸ್ ದೆಪ್ಪರೆಗ್ ಆ ಪಾದೆ ಸೇಬಿ ಇಪ್ಪೊಡು. ಪಂಡ ಪದವು(ಮೈದಾನ)ದ ಲೆಕೊ ಉಪ್ಪೊಡು. ನೀರ್ ಜತ್ತುದು ಪೋಯಿ ಲೆಕೊ ಉಪ್ಪೊಡು. ಜನಕುಲು ಕುಲ್ಲರೆ ಜಾಗ್ ಉಪ್ಪೊಡು. ಮದ್ಮಯೆ,ಮದ್ಮಲ್ ಕುಲ್ಲರೆ ಕಲ್ಲುದ ಗದುಗೆ ಪಾಡ್ದ್ ಅವು ಸಾಸ್ವತವಾದ್ ಉಪ್ಪುಂಡು. ಅವೆಟ್ಟ್ ಏರೆಗ್ಲಾ ಮದಿಮೆ ಆವೊಲಿ.ಆ ಕಾಲೊಡು ದೊಂಬು ಬರ್ಸೊಗು ದೊಂಪ ಪಾಡ್ದ್ ಈ ಮಂಗಿಲ ಪಾದೆದ ಮಂಗಿಲ ಕಲ್ಲುಡು ಮಂಗಿಲ ಆತ್ಂಡ್.ಆ ಕಾಲೊಡು ದೊಂಪ ಪಾಡುನ ಬೆದ್ರ್, ಸೀಮೆಕೋಲು, ಬೇತೆ ಬೇತೆ ಮರತ್ತ ಒಯಿಕುಲು ಪಾದೆದ ಕೈತಾಲುಡೇ ತಿಕ್ಕೊಂದು ಇತ್ತ್ಂಡ್. ಕೈತಾಲ್ದ ಮರೊಡ್ದು ಮರೊಕ್ಕು ಒಯಿ ಪಾಡ್ದ್ ದೊಂಪ ಪಾಡೊಂದು ಇತ್ತೆರ್. ಮಂಗಿಲ ಪಾದೆಡೇ ಅಟಿಲ್ ಮಲ್ತ್ ಮಂಗಿಲದ ವನಸ್ ಮಲ್ದೆರ್.ಕೈತಲ್ ಇತ್ತಿನ ಪಟ್ಲ ಜಾಗ್ದ (ಅಪಗ ಸರಿ ಆಯಿನ ತೋಡು ತುದೆ ಇತ್ತಿಜಿ)ನೀರ್ ಕಂತೊಂದು ಇತ್ತೆರ್.
ತುಲುನಾಡ್ಡ್ ಮಂಗಿಲ ಕಲ್ಲ್, ಮಂಗಲ ಕಲ್ಲ್, ಮಂಗಿಲ ಪಾದೆ, ಮಂಗಲ ಪಾದೆ ಪನ್ಪುನ ಜಾಗೆಲು ಊರುಲು ಉಲ್ಲ. ಅವತ್ತಂದೆ ಕೆಲವು ಕಡೆಟ್ಟ್ ಮಂಗಿಲ ಪದವು,ಮಂಗಲ ಪದವು ಪನ್ಪುನ ಜಾಗೆ ಊರುಲು ಉಂಡು. ಈ ಪದವು ಊರುಡು ಪಾದೆ ಕಲ್ಲುಲು ತೋಜುಜ.ಐತ್ತ ಬದಲ್ ಆ ಊರುದ ಜಾಗೆಡ್ ಮುರ ಕಲ್ಲುದ ನೆಲನೇ ತೋಜುಂಡು. ಕೆಸರ್,ಕಿರಿಂಚಿ ದಾಂತಿನ ಜಾಗೆಡ್ ಮಂಗಿಲ ಕಲ್ಲ್ ಪಾಡ್ದೆರ್. ದೊಂಪ ಪಾಡ್ದ್ ಮಂಗಿಲ ಆತೆರ್.
ತುಲುನಾಡ್ಡ್ ನಂಬುಗೆಗ್ ತುಲುವೆರ್ ಕಲ್ಲುಗು ದಿಂಜಗೌರವ ಕೊರ್ತೆರ್. ದಾಯೆ ಪಂಡ ಅವು ಸಾಸ್ವತವಾದ್ ಒರಿಂಡು ಪನ್ಪುನ ನಂಬಿಗೆ.ಐಟ್ಟ್ ಸುರುತ್ತ ಕಲ್ಲೇ ನಾಗ ಬೆರ್ಮೆರೆನ ಕಲ್ಲ್, ಮಂಗಿಲ ಕಲ್ಲ್, ಅಜ್ಜ-ಅಜ್ಜಿ ಕಲ್ಲ್, ಬೂತದ ಕಲ್ಲ್,ಕೌಂತಿನ ಕಲ್ಲ್,ಗೋವುದ ಕಲ್ಲ್ ಇಂಚ.ಸಾರ ಸಾರ ವರ್ಸೊಡ್ದು ದುಂಬು ಪಾಡ್ದ್ ನಂಬಿನ ಇಂಚಿನ ಕಲ್ಲುಲು ಇತ್ತೆ ಬೇತೆ ಬೇತೆ ಕಾರನೊಡು ನಾಸ ಆತುಂಡು.ಅಂಚೆನೆ ಆನಿದ ಕಾಲೊಡು ಪಾದೆಡ್ ಪಾಡ್ದಿನ ಮಂಗಿಲ ಕಲ್ಲ್ ನಾಸ ಆತ್ಂಡ್. ಕೆಲವು ಕಡೆಟ್ಟ್ ಐತ್ತ ಪುದರ್ ಮಾತ್ರ ಉಂಡು.ಅವುಲು ಮಂಗಿ ಲ ಕಲ್ಲುಲು ಇತ್ತ್ಂಡಲಾ ಐತ್ತ ಇತಿಹಾಸ, ಐತ್ತ ಅರ್ತ ಗುರ್ತ ತಿಕ್ಕಂದೆ ಪೋತುಂಡು. ಪಾದೆದ ಪುದರ್ ಮಂಗಿಲಪಾದೆ, ಮಂಗಲಪಾದೆ,, ಮಂಗಿಲ ಕಲ್ಲ್, ಮಂಗಲ ಕಲ್ಲ್ ಪಂದ್ ಇತ್ತ್ಂಡಲಾ ಅವುಲು ಈ ಕಲ್ಲುಲೆನ ಗುರ್ತ ತಿಕ್ಕುಜಿ.ದಾಯೆ ಪಂಡಾ ಅಲ್ಪ ಪಾದೆಲು ಮಾತೊ ನಾಸೊ ಆತುಂಡು. ಇದ ಮುಟ್ಟ ಮುಟ್ಟಂದಿನ ಕಲ್ಲುಲೆಡ್ ಮಂಗಿಲ ಕಲ್ಲುಲು ಉಲ್ಲೊ. ಆಂಡ ನಾಡುನನೇ ಬಙದ ಬೇಲೆ.ಈ ಮಂಗಿಲ ಕಲ್ಲ್, ಮಂಗಲ ಕಲ್ಲ್,ಮಂಗಿಲ ಪಾದೆ,ಮಂಗಲ ಪಾದೆ ಪನ್ಪಿ ಪುದರುಲು ಇತ್ತೆ ಇಜ್ಜಿಡಲಾ ಅವುಲು ಅಲ್ಪದ ಪಾದೆಲೆಡ್ ಮಂಗಿಲದ ಕಲ್ಲುಲು ಉಪ್ಪರೆ ಯಾವು.
ಅಗೆಲ ಜಾಗೆ ಇತ್ತಿನ ಪಾದೆಡ್ ಮಂಗಿಲ ಕಲ್ಲ್ ಪಾಡ್ದೆರ್. ಐಕ್ ಮೂಜಿ ಕಲ್ಲ್ ಗಲಸುದೆರ್.ಐಟ್ ರಡ್ಡ್ ಕಲ್ಲುನು ಒಂಜೇ ರೂಪೊಡು ಎಲ್ಲಿ ಮಲ್ಲೆ ಮಲ್ದೆರ್. ಐಟ್ ಮಲ್ಲವು ಮದ್ಮಯೆ.ಎಲ್ಯವು ಮದ್ಮಲ್ ಪನ್ಪಿನಂಬುಗೆ ದೀಯೆರ್.ಈ ರಡ್ಡ್ ಕಲ್ಲು ಕುಲ್ಲುನ ಅಲತೆದ ಕಲ್ಲೇ ಮೂಜನೆದ ಕಲ್ಲ್.ಈ ಮೂಜನೆದ ಕಲ್ಲ್ ರಡ್ಡ್ ಮೆದುವಾಯಿನ ಲತ್ತ್ ಉಡಲುಲೆನ್ ಒಟ್ಟು ಮಲ್ಪುನ ವು ಆದುಂಡು ಪನ್ಪಿ ನಂಬಿಗೆನ್ ದೀವೊಂಡೆರ್.ಆ ಮೂಜನೆ ಕಲ್ಲುನು ಕೆಲವು ಕಡೆಟ್ಟ್ ಈ ರಡ್ಡ್ ಕಲ್ಲುದ ಅಡಿಟ್ಟ್ ದೀಯೆರ್.ಕೆಲವು ಕಡೆಟ್ಟ್ ಮೂಜನೆ ಕಲ್ಲುನು ಆ ರಡ್ಡ್ ಕಲ್ಲುದ ಮಿತ್ತ್ ದೀದ್ ಐತ್ತ ಮಿತ್ತ್ ಆನ್ ಪೊನ್ನು ಕುಲ್ಲುನ ವ್ಯವಸ್ಥೆ ಮಲ್ದೆರ್.ನನ ಕೆಲವು ಪಾದೆಡ್ ಆ ಮೂಜನೆ ಕಲ್ಲು ಈ ರಡ್ಡ್ ಕಲ್ಲುದ ಅಲತೆಗ್ ಸಮ ಮಲ್ತ್ ಪಿರಾವು ಮೆಯಿಟ್ ದೀದ್ ಇರ್ವೆರೆನ್ ಒಟ್ಟು ಮಲ್ತ ಪನ್ಪಿ ನಂಬಿಗೆ ತೊಜಿಪಾದೆರ್. ಇತ್ತೆ ಈ ಮಂಗಿಲ ಕಲ್ಲುಲೆನ್ ನಾಡಿಯೆರೆ ಪೋಂಡಾ ಎಚ್ಚಿನ ಕಡೆಟ್ ಕಲ್ಲುಲು ಪಾಡ್ದಿನ ಜಾಗೆಡ್ ತೂವರೆ ತಿಕ್ಕುನ ಬಙ ಉಂಡು. ಸಾರ ಸಾರ ವರ್ಸೊಲು ಆಯಿನ ಡ್ದಾವರ ಕಲ್ಲ್ ದೆಪ್ಪುನ ಬೇಲೆ ಆನಿಡ್ದಿಂಚಿ ನಡತೊಂದು ಇಪ್ಪುನಡ್ದಾವರ ಆ ಕಲ್ಲುಲು ಓಲೊಲು ಬೂರುದು ಪೋತುಂಡು ನಾಸೊ ಆತ್ಂಡ್.
ಐ.ಕೆ.ಗೋವಿಂದ ಭಂಡಾರಿ, ಕಾರ್ಕಳ
(ನಿವೃತ್ತ ವಿಜಯಾ ಬ್ಯಾಂಕ್ ಮ್ಯಾನೇಜರ್)
