ತೊರತ್,ತುರತ್,ಸೊರತ್, ಸುರತ್ ಈ ಸಬ್ದೊಲೆನ ಅರ್ಥ ಒಂಜೇ ಆದುಂಡು.ಪಂಡ ಒತ್ತಂದೆ, ತಿಕ್ಕಂದೆ, ಕೆರೆಪಂದೆ ನೀರ್ಡ್ ತೊರಪುನು, ತುರಪುನು, ಸೊರಪುನು ಸುರಪುನು. ಪಂಡ ದೆಕ್ಕುನು. ನೀರ್ ಪಾಡ್ದ್ ಸುತ್ತು ಕಂತುದ್ ತಿರ್ತ್ ಮಿತ್ತ್ ಕುರ್ಕುದು ಗೂಚುನು. ಪನವುನು ತರೆ ಸುತ್ತ ಸುತ್ತದ್ ತಿರ್ತ್ ಮಿತ್ತ್ ಮಲ್ತುದು ಡಬ್ಬಿದ ಉಲಾಯಿ ಪಾಡುನುನೆಕ್ಲಾ ತೊರಪುನು ಪನ್ಪೆರ್. ದೃಷ್ಟಿ ದೆಪ್ಪುನೈಕ್ಲಾ ತೊರಪುನು ಪನ್ಪೆರ್.
” ಸುರತ್ಕಲ್ ” ಊರುಗು ” ತೊರತ್ತಲ್ ಪಂದ್ಲಾ ಲೆಪ್ಪುವೆರ್. ಮುಲ್ಪ ತೊರತ್ಕಲ್ ಪನ್ಪಿ ಪುದರ್ನ್ ಎಲ್ಯ ಮಲ್ತ್ “ಕ” ಅಕ್ಷರೊನು ದಿಂಗುದ್ ತೊರತ್ತಲ್ ಪಂದ್ ಲೆವುದೆರ್. ಸುರತ್ ಕಲ್ಲ್ ಸುರತ್ಕಲ್ ಆಯಿಲೆಕೊನೆ ತೊರತ್ ಕಲ್ಲ್ ತೊರತ್ಕಲ್ ಆತುಂಡು. ತೊರತ್ಕಲ್ ಪುದರೇ ಮೂಲದ ಪುದರ್. ತೊರತ್ಕಲ್ ಪುದರ್ಡ್ ರಡ್ಡ್ ಸಬ್ದೊಲು ಉಂಡು. ಒಂಜನೆದವು “ತೊರತ್” , ರಡ್ಡನೆದವು “ಕಲ್ಲ್”.ಅಂಚೆನೆ ಸುರತ್ಕಲ್ ಪುದರ್ಡ್ಲಾ “ಸುರತ್” ಬೊಕ್ಕ “ಕಲ್ಲ್ ” ಪನ್ಪುನ ರಡ್ಡ್ ಸಬ್ದೊಲು ಉಲ್ಲ. ಅರ್ತ ಒಂಜೇ ಆದುಂಡು.
ಈ ತೊರತ್ ಕಲ್ಲ್ ನಾಡರೆ ಬಙ ಇಜ್ಜಿ. NITK BEACH (ಕಡಲ ಬರಿ)ದ ಕೈತಾಲ್ ಅತ್ತುಡ ತೊರತ್ತಲ್ ಸುರತ್ಕಲ್ ಕಡಲ ಬರಿಟ್ ತೋಜುನ ಮಾತಾ ಕಲ್ಲುಲು ತೊರತ್ ದೀತಿನ ಕಲ್ಲುಲೆ. ಆ ಕಲ್ಲುಲೆಡ್ ಕುರೆ ಪತ್ತುದ್ ಇಜ್ಜಿ. ಕೆರೆತುದು, ಒತ್ತುದು, ತಿಕ್ಕುದು ದೆಕ್ಕರೆ ಇಜ್ಜಿ.ಕಾಲಿ ತೊರತುಂಡ ಆಂಡ್. ಮುಲ್ಪನೆ ಪನವು ತೊರತುದು ಕಡಲ್ಗ್ ಪಾಡೊಲಿ. ತುಲುನಾಡ್ ಒರ್ಮೆಲ ಪಾದೆ ಕಲ್ಲು ಕಪ್ಪು ಉಂಡು. ತೊರಪುನ ಬುಡಿ ಏತ್ ಉರ್ದುಂಡಲಾ ಪತ್ತಿದಿನ ಕಪ್ಪು ಪಾಮಜಿ ಬುಡಂದ್. ಈ ತೊರತ್ ಸುರತ್ ಕಲ್ಲುಲು ಒಂಜಿ ವಿಸೇಸನೇ ಮುಲ್ಪ ಆದುಂಡು .ಪಾಮಜಿ ಪತ್ತುಜಿ. ದೆಕ್ಕ್ ದೀಯಿ ಲೆಕೊನೆ. ತೊರತ್ ದೀಯಿ ಲೆಕೊನೆ. ಬೊಲ್ದು ಬೊಲ್ದು ಮಡಿ ತೋಜುಂಡು. ಐಕ್ಕೆ ಪಂತೆರ್ ತೊರತ್ ಕಲ್ಲ್,ಸೊರತ್ ಕಲ್ಲ್ ಪಂದ್.
ಆ ಕಲ್ಲುಲೆಡ್ ಕುರೆ ಪಾಮಜಿ ಪತ್ತುಜಿ ದಾಯೆ?ದಾಯೆ ಪಂಡ ಈ ಪಾದೆ ಕಲ್ಲುಡು ಬೊಲ್ಕಲ್ದ ದಿಂಜ ಅಂಸೊಲು ದಿಂಜಿದ್ ಉಂಡು .ಬೊಲ್ಕಲ್ಗ್ ಕುರೆ ಪಾಮಜಿ ಪತ್ತುಜಿ. ಅಂಚ ಅವು ತೊರತುದ್ ದೀಯಿ ಲೆಕೊ ತೋಜುಂಡು. ಆನಿದ ಮೂಲದ ಜನಕುಲೇ ಈ ಕಲ್ಲುಲೆನ್ ತೂದು ತೊರತ್ ಕಲ್ಲ್ ಪಂದ್ ಲೆವುದೆರ್. ಬೊಕ್ಕದ ಕಾಲೊಡು ತೊರತ್ತಲ್, ಸುರತ್ಕಲ್ ಪಂದ್ ಲೆತೊಂದು ಬತ್ತೆರ್. ಮುಲ್ಪದ ಒಂಜೊಂಜಿ ಪಾದೆ ಕಲ್ಲುಲೆಡ್ ಬೊಲ್ಕಲ್ದ ಒಟ್ಟು ಮುರ ಕಲ್ಲುದ ಅಂಸೊಲಾ ತೋಜುಂಡು.
ಕಡಲ ಬರಿತ್ತ ತೊರತ್ ಕಲ್ದ ಮಿತ್ತೆ ಉಂಡು ದೀಪದ ಕಮ್ಮ. ಅವ್ವೇ ಲೈಟಿಂಗ್ ಹೌಸ್. ದೀಪದ ಕಮ್ಮದ ಮಿತ್ತ್ಉಂಡು ಪೊರ್ಲುದ ಸದಾಶಿವ ಮಹಾಗಣಪತಿ ದೇವಸ್ಥಾನ. ದೀಪದ ಕಮ್ಮದ ಬರಿಟ್ಟೇ ಉಂಡು ಬಾರಿ ಪಿರಾಕ್ದ ರಾಜೆರೆ ಕಾಲದ ಪುರಾತನದ ಕಾಪುನ ಕಮ್ಮದ ಅವಶೇಷ. ಕಾಪು ಊರುದ ಕಾಪುನ ಕಮ್ಮದ ಅಚ್ಚಿಡೆ ತೊರತ್ತಲ್ಡ್ ಲಾ ಕಾಪುನ ಕಮ್ಮ ಇತ್ತುಂಡ್. ಇತ್ತೆದ ಬೊಲ್ಪುದ ಕಮ್ಮ ಕಡಲ್ ಕಾಪುಂಡು. ಆಂಡ ಆನಿದ ಕಮ್ಮ ಕೃಷಿ ಬುಲೆತ್ತ ಬೂಮಿಗ್ ಪ್ರಾನಿ ಪಕ್ಕಿಲು ಬರಂದಿ ಲೆಕೊ ಕಾತೊಂದು ಇತ್ತುಂಡ್. ಬ್ರಿಟಿಸೆರೆನ ಕಾಲೊಡು ಈ ಕಾಪುನ ಕಮ್ಮೊನು ರಿಪೇರಿ ಮಲ್ದಿನ ತೋಜುಂಡು. ಕರ್ಬ ಸಿಮೆಂಟ್ ಗಲಸ್ದ್ ಗಟ್ಟಿ ಮಲ್ದಿನ ತೋಜುಂಡು. ರಾಜೆರೆನ ಕಾಲೊಡು ಕರ್ಬ ಸಿಮೆಂಟ್ ಇತ್ತುಜಿ. ಇತ್ತೆ ಇಪ್ಪುನ ಕಡಲ್ ಕಾಪುನ ಬೊಲ್ಪುದ ಕಂಬೊನು 1972 ಇಸವಿಡ್ ಭಾರತ ಸರ್ಕಾರ ಸುರತ್ಕಲುಡು ಕಟ್ದೆರ್.
ತೊರತ್ತಲ್ ಸುರತ್ಕಲ್ ಈ ಪುದರ್ ಪುಟ್ಟಿನ ಜಾಗನೇ ಕಡಲ ಬರಿಟ್ಟ್ ತೋಜುನ ತುಡಾರ್ ಕಮ್ಮದ ಕೈತಾಲ್. ತೊರತುದು ದೆಕ್ಕ್ ದೀತಿನ ಕಲ್ಲುಲೇ ಸುರತ್ಕಲ್ದ ಪೆರಿಯ ಗಡಿ. ದೆಕ್ಕುದು ತೊರತುದು ದೀತಿನ ಕಲ್ಲುಲೇ ತೊರತ್ತಲ್ ಸುರತ್ಕಲ್ ಆತುಂಡು. ತುಲು ಬಾಸೆ ತೆರಿಪಾಂಡ್.ಕಲ್ಲ್ ತೊಜಿಪಾಂಡ್.ದೈವ ದೇವೆರೆನಕುಲು ಜ್ಞಾನ ಕೊರಿಯೆರ್. ಅವೆನ್ ತುಲುನಾಡ್ಗ್ ತೆರಿಪಾದೆ.
ಐ.ಕೆ.ಗೋವಿಂದ ಭಂಡಾರಿ, ಕಾರ್ಕಳ
(ನಿವೃತ್ತ ವಿಜಯಾ ಬ್ಯಾಂಕ್ ಮ್ಯಾನೇಜರ್)
