ನಮ್ಮ ಸಮಾಜದಲ್ಲಿ ಬದುಕುವ ಪ್ರತಿಯೊಂದು ಜೀವಿಗೂ ಜೀವನ ಮೌಲ್ಯ ಎಂಬುದಿದೆ. ಆದರೆ ಜೀವನದ ಅರ್ಥವನ್ನು ಸರಿಯಾಗಿ ಕಂಡುಕೊಂಡವರು ಯಾರೂ ಇಲ್ಲ. ಅಯ್ಯೋ ಇವನೇನು ಜೀವನದ ಬಗ್ಗೆ ಹೇಳುತ್ತಿದ್ದಾನಲ್ಲ ಅಂತ ಅಂದುಕೊಳ್ಳಬೇಡಿ. ನಾನು ಹೇಳಲು ಹೊರಟಿರುವ ವಿಷಯವೇ ಬೇರೆ. ಮನುಷ್ಯ ಏನೇ ಮಾಡಲು ಹೊರಟರೂ ಅದು ಜೀವನಕ್ಕೋಸ್ಕರ. ಪ್ರತಿಯೊಬ್ಬರಲ್ಲೂ ಒಂದು ಆಸೆ, ಆಸಕ್ತಿ, ಆಕಾಂಕ್ಷೆಗಳಿರುತ್ತವೆ. ಅಂತಹ ಆಸಕ್ತದಾಯಕರಲ್ಲಿ ನಾನೂ ಒಬ್ಬ. ಈ ಪ್ರಕೃತಿಯಲ್ಲಿ ಹರಿಯುವ ನೀರು, ಮುಳುಗುವ ಸೂರ್ಯ, ಹಾರುವ ಹಕ್ಕಿ, ಮಿನುಗುವ ನಕ್ಷತ್ರ, ಇವುಗಳನ್ನು ನಾವು ಪ್ರತಿನಿತ್ಯ ನೋಡುವಂತದ್ದೆ. ಆದರೆ, ಅದೇ ಜನರು ಫೇಸ್ ಬುಕ್, ವಾಟ್ಸಾಪ್ ಗಳಲ್ಲಿ ಇದೇ ನಿಸರ್ಗದ ಪ್ರತಿಗಳನ್ನು ನೋಡಿ ಕಣ್ತುಂಬಿಕೊಳ್ಳುತ್ತಾರೆ. ಅದನ್ನು ತುಂಬಾ ಇಷ್ಟಪಡುತ್ತಾರೆ ಕೂಡ. ಅದಕ್ಕೆ ಕಾರಣ ಒಂದು ಅಧ್ಬುತ ಫೊಟೋಗ್ರಾಫಿಕ್ಸ್ ಮತ್ತು ಅದನ್ನೇ ಉಸಿರಾಗಿಸಿಕೊಂಡ ಒಬ್ಬ ಅದ್ಭುತ ಫೋಟೋಗ್ರಾಫರ್. ಈಗ ಖಂಡಿತವಾಗಿಯೂ ನಿಮಗೆಲ್ಲ ನನ್ನ ಆಸಕ್ತಿ ತಿಳಿದಿರುತ್ತದೆ.
ಹೌದು, ಕಳೆದ ಸುಮಾರು ವರ್ಷಗಳಿಂದ ಈ ಫೋಟೋಗ್ರಾಫಿ ತನ್ನದೇ ಆದ ಮಹತ್ವವನ್ನು ಪಡೆದುಕೊಂಡು ಬಂದಿದೆ. ಇಂದಿನ ಯುವ ಸಮೂಹ ಈ ಫೋಟೋಗ್ರಾಫಿಯನ್ನು ಒಂದು ಹವ್ಯಾಸವಾಗಿ ಬಳಸಿಕೊಂಡು ಬರುತ್ತಿದ್ದಾರೆ. ಹಿಂದಿನ ಕಾಲದಲ್ಲಿ ಈ ಫೋಟೋಗ್ರಾಫ್ ಎಂಬ ಪದಕ್ಕೆ ಬೇಡಿಕೆ ಇಲ್ಲದಿದ್ದರೂ ಸಹ ಈ ವರ್ತಮಾನ ಕಾಲದಲ್ಲಿ ಸಮಾಜದ ಯುವ ಸಮೂಹಕ್ಕೆ ತಮ್ಮ ಪ್ರತಿಭೆಯನ್ನು ತೋರಿಸಿಕೊಡಬಹುದಾದ ಉತ್ತಮ ವೇದಿಕೆಯಾಗಿ ನಿರ್ಮಾಣಗೊಂಡಿದೆ.
ಹೌದು ನಮಗೆ ಫೋಟೋಗ್ರಾಫರ್ಸ್ ಅಂದಾಕ್ಷಣ ತಕ್ಷಣ ಕಣ್ಣೆದುರಿಗೆ ಬರುವುದು ಆಸ್ಟ್ರೋ ಮೋಹನ್ ರಂತಹ ಮಹಾನ್ ಫೋಟೋಗ್ರಾಫರ್ಸ್. ಇಂತಹ ಮಹಾನ್ ಫೋಟೋಗ್ರಾಫರ್ಸ್ ರಿಂದಲೇ ನಮ್ಮ ಸಮಾಜಕ್ಕೆ ಕೀರ್ತಿ ಹೆಚ್ಚಾಗಿದೆ. ಆದ್ರೆ ಒಬ್ಬ ಫೋಟೋಗ್ರಾಫರ್ಸ್ ನ ನೋವು ಕೆಲ ವ್ಯಕ್ತಿಗಳಿಗೆ ಮಾತ್ರ ತಿಳಿದಿರುತ್ತದೆ. ಒಂದು ಮದುವೆ ಕಾರ್ಯಕ್ರಮ ಅಂದರೆ ಮೊದಲು ಬರುವುದು ಫೋಟೋಗ್ರಾಫರ್. ಮದುವೆ ಮುಗಿದ ನಂತರ ಕೊನೆಗೆ ಹೋಗುವುದು ಕೂಡ ಫೋಟೋಗ್ರಾಫರ್. ಈ ಎರಡರ ಮಧ್ಯೆ ತನ್ನ ಹಸಿವು, ಬಾಯಾರಿಕೆ, ಆಯಾಸವನ್ನು ಲೆಕ್ಕಿಸದೆ ನಿಷ್ಠೆಯಿಂದ ತನ್ನ ಕೆಲಸವನ್ನು ಆತ ಮಾಡುತ್ತಾನೆ. ಬೇರೆ ಮನೆಯ ಮದುವೆಯಾದರೂ ತನ್ನ ಮನೆಯ ಸಮಾರಂಭವೆಂಬಂತೆ ಓಡಾಡುತ್ತಾನೆ. ಹೀಗಾಗಿ ಪ್ರತಿಯೊಬ್ಬ ಛಾಯಾಗ್ರಾಹಕನ ಹಿಂದೆಯೂ ಆತನ ಉತ್ತಮ ಛಾಯಾಚಿತ್ರದ ಹಿಂದೆಯೂ ನಿಷ್ಠೆ, ಕಷ್ಟ ಎಲ್ಲವೂ ಇರುತ್ತದೆ. ಹೀಗಾಗಿ ಎಲ್ಲರೂ ಅದನ್ನು ಅರಿಯುವಂತಾಗಬೇಕು.
-ವೈಶು ಭಂಡಾರಿ, ಮಿಜಾರು
