ಅಪ್ಪ.. ನೀನಂದ್ರೆ ನನಗಿಷ್ಟ……….. :-✍ ಸುಪ್ರೀತಾ ಭಂಡಾರಿ ,ಸೂರಿಂಜೆ .

     ಅಮ್ಮ ಲಾಲಿಸಿದರೆ , ಅಪ್ಪ ಪಾಲಿಸಿ ಮುತ್ತಿನೊಡನೆ ತನ್ನ ಗಡ್ಡ ತುರಿಸಿ ಕಚಗುಳಿ ನೀಡುತ್ತಾ ಮತ್ತಷ್ಟು ಹತ್ತಿರವಾಗುತ್ತಾರೆ. ಇಲ್ಲಿ ತಂದೆ ಮಗಳ ಜನ್ಮಕ್ಕೆ  ಬರೀ ಕಾರಣೀಕರ್ತನಷ್ಟೇ ಅಲ್ಲ; ತಂದೆ ಮತ್ತು ಮಗಳ ಸಂಬಂಧವೆಂಬುದು ಜನುಮ-ಜನುಮಾಂತರದ ಸಂಬಂಧವಾಗಿದ್ದು, ತಂದೆಯ ಪಾತ್ರ ಕೇವಲ ಪಾಲನೆ ಪೋಷಣೆಗೆ ಮಾತ್ರ ಸೀಮಿತವಲ್ಲದೇ ಅವಳ ವಿದ್ಯಾಬ್ಯಾಸ, ಮದುವೆ , ಮದುವೆ ನಂತರದ ಯೋಗಕ್ಷೇಮ ಎಲ್ಲದರಲ್ಲಿಯೂ ಭಾಗಿಯಾಗುತ್ತಾನೆ. ಹಾಗೆಯೇ ಮಗಳು ಕೂಡ ತಂದೆಗೆ ಮಗಳಾಗಿರದೇ ಮಗನಂತೆ ಮನೆಯ ಜವಬ್ದಾರಿ ತೆಗೆದುಕೊಂಡು ಅಪ್ಪನಿಗೆ ಒಳ್ಳೆಯ ಸ್ನೇಹಿತೆಯಾಗಿ, ಬಂಧು ಬಳಗದ ಕನಸುಗಳಿಗೆ ದಾರಿದೀಪವಾಗಿರುತ್ತಾಳೆ. ತಂದೆಯ ಮುಪ್ಪಿನಾವಸ್ಥೆಯಲ್ಲಿ ಅಥವಾ ಅನಾರೋಗ್ಯದ ಸಮಯದಲ್ಲಿ ಅವರ ಲಾಲನೆ- ಪಾಲನೆ ಮಾಡಿ ತಾಯಿ ಸ್ಥಾನವನ್ನು ನೀಡಬಲ್ಲವಳಾಗಿರುತ್ತಾಳೆ. ಅಪ್ಪ ಎಂದರೆ ಭಯ ಎಷ್ಟಿದೆಯೋ ಅದಕ್ಕೆರಡರಷ್ಟು ಮಿಗಿಲಾದ ಪ್ರೀತಿ ಇದೆ. ಸಹೃದಯಾ, ಕರುಣಾಮಯಿ, ತ್ಯಾಗಮಯಿ, ಜನುಮದಾತ… ಬಣ್ಣಿಸಲಾಗದು ಅವರ ಸಜ್ಜನಿಕೆಯ ವ್ಯಕ್ತಿತ್ವ.