ನಮ್ಮ ತುಳುನಾಡ್ದಕ್ಲೆಗ್ ಪರ್ಬ ಪಂಡ ಅವ್ವು ದೀಪಾವಳಿ (ತುಡರ ಪರ್ಬ). ಇಲ್ಲಡ್ ಏತೆ ಬಡಪತ್ ಇತ್ತುಂಡಲ ತುಡರ್ ಪರ್ಬನ್ ಅಕ್ಲೆನ ಮಟ್ಟಗ್ ಗಮ್ಮತ್ ಡೇ ಮನ್ಪುವೆರ್. ತುಡರ್ ಪರ್ಬ ಪನ್ನಗ ನೆನಪು ಬರ್ಪುನಿ, ಆಯುಧ ಪೂಜೆ, ಬಲಿಯೇಂದ್ರ ಪೂಜೆ ಬೊಕ್ಕ ಗೋ ಪೂಜೆ. ಪರ್ಬ ಬರ್ಪುನೆರ್ದ್ ತಿಂಗೊಲು ದುಂಬೆ ಪರ್ಬದ ಬೇಲೆ ಸುರು ಅವೊಂದಿತ್ತುಂಡ್. ಮೀಪಿನ ಪರ್ಬದಾನಿ ಎಣ್ಣೆ ಪೂಜೊಂದು, ಮೀದ್, ಬಜಿಲ್ ತಿನ್ಪಿನ ಖುಷಿ, ಬಯ್ಯ ಶಾಲೆರ್ದ್ ಬತ್ತುದ್ ಕೇಪುಲ ಪೂ, ಜಂಗಮೇದ ಪೂ, ಕುದ್ಕನ ಪೂ, ಕುರ್ಡಿ ಪೂ, ಗೊಂಡೆ ಪೂ ಕನಯರೆ ಗುಡ್ಡೆ ಗುಡ್ಡೆ ತಿರ್ಗಿನ ಖುಷಿ, ನೊಗ, ನಾಯರ್, ಕೊಟ್ಟು ಪಿಕ್ಕಾಸ್, ಇಲ್ಲಡಿತ್ತಿ ಕರ್ಬದ ಸಮಾನ್ ಗ್ ಪೂಜೆ ಮಂತಿನ ನೆನಪು, ಗೋ ಪೂಜೆಗ್ ಇಲ್ಲಾಡಿತ್ತಿ ಪೆತ್ತ ಕಂಜಿ ಕೈಕಂಜಿಲೆನ್ ಕೆದುಕು ಕೋನೋದು ಮೀಪಾದ್ ಐಕ್ಲೆಗ್ ಗೊಂಡೆ ಪೂತ ಮಾಲೆ ಪಾಡುದು ಕಿದೆಟ್ ಕೊನೊದು ಬುಡುಂಡ, ಬಯ್ಯಡ್ ಬಲಿಯೇಂದ್ರನ ಪೂಜೆಗ್ ತಯಾರಿ ಮಂತೊಂದು ಇಲ್ಲ್ ನಿಲ್ಕೆ ತಿಪಿಲದ ದೀಪನ್ ಪೊತ್ತಾದ್, ಕಿದೆ, ಗುವೆಲ್ದ ದಂಡೆಡ್ ಕ್ಯಾಂಡಲ್ ಪೊತ್ತಾದ್ ದೂರಡ್ ಉಂತುದು ತೂತಿನ ಖುಷಿ ಇತ್ತೆ ನೆನಪು ಮಾತ್ರ, ಬಲಿಯೇಂದ್ರಗ್ ದೀತಿ ಕಂಬದಡೆ ಪೂದು ಪೂಜೆ ಮಂತುದ್, ಮೂಜಿ ಸರ್ತಿ ಕೂ ಪಾಡುದು ಲೆತ್ತುದು, ಪೆತ್ತ ಕೈಕಂಜಿಲೆಗ್ ತುಡರ್ ತೋಜಾದ್ ಇಲ್ಲಡ್ ಮಂತಿ ಗೋಳಿದ ಇರೆತ, ಪೆಜತ ಇರೆತ ಗಟ್ಟಿನ್ ತಿನ್ಪಾವುನ ಖುಷಿತ ನೆನಪು ಮಜಾಂದೆ ಒರಿದುಂಡ್
ಇಲ್ಲದಕ್ಲು ಮಾತ ಒಟ್ಟು ಸೇರ್ದ್ ಮನ್ಪಿ ಪರ್ಬ ಇತ್ತೆ ಕಮ್ಮಿ ಆತುಂಡತ ಪನ್ಪಿನನೆ ಬೇಜಾರ್ದ ಸಂಗತಿ.
-ದೀಪಕ್ ಸದಾಶಿವ, ಮೂಡಬಿದ್ರಿ
