ಬೆಳೆಯವ ಮಕ್ಕಳಲ್ಲಿ ಈ ಸಂಗತಿಗಳನ್ನು ಕಡೆಗಣಿಸಲೇಬೇಡಿ
ಮಕ್ಕಳ ಪ್ರತೀ ಚಟುವಟಿಕೆಯಲ್ಲಿಯೂ ನಿಗಾ ವಹಿಸುವುದು ಮುಖ್ಯವಾಗಿರುತ್ತದೆ. ಹಠ, ಸಿಟ್ಟು, ಸೆಡವು ಎಲ್ಲವೂ ಸಾಮಾನ್ಯವೇ. ಆದರೆ ಅದನ್ನು ಹತೋಟಿಯಲ್ಲಿಟ್ಟು ಜೀವನ ಕೌಶಲ್ಯಗಳನ್ನು.
ಬೆಳೆಯುತ್ತಿರುವ ಮಕ್ಕಳ ಮೇಲೆ ಸದಾ ಗಮನ ಹರಿಸುವುದು ಅತೀ ಮುಖ್ಯವಾಗಿರುತ್ತದೆ. ಏಕೆಂದರೆ ವೇಗದ ಜೀವನದಲ್ಲಿ ಅಪ್ಪ ಅಮ್ಮ ಕೆಲಸಕ್ಕೆ ಹೋದರೆ ಮನೆಯಲ್ಲೇ ಇರುವ ಮಕ್ಕಳು ಏನು ಮಾಡುತ್ತಾರೆ ಎಂದು ತಿಳಿಯುವುದಿಲ್ಲ.
ಅಲ್ಲದೆ ಇದು ಮಕ್ಕಳ ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ. ಹೀಗಾಗಿ ಅವರ ಪ್ರತೀ ಚಟುವಟಿಕೆಯಲ್ಲಿಯೂ ನಿಗಾ ವಹಿಸುವುದು ಮುಖ್ಯವಾಗಿರುತ್ತದೆ. ಹಠ, ಸಿಟ್ಟು, ಸೆಡವು ಎಲ್ಲವೂ ಸಾಮಾನ್ಯವೇ. ಆದರೆ ಅದನ್ನು ಹತೋಟಿಯಲ್ಲಿಟ್ಟು ಜೀವನ ಕೌಶಲ್ಯಗಳನ್ನು ಅಳವಡಿಸಿ ಬೆಳೆಸುವುದು ಮುಖ್ಯವಾಗಿರುತ್ತದೆ.
ಕೆಲವೊಂದು ನಡುವಳಿಕೆಗಳು ಮಕ್ಕಳ ಭವಿಷ್ಯವನ್ನು ಹಾಳು ಮಾಡಬಹುದು ಅಥವಾ ಅವರ ಮಾನಸಿಕ ಆರೋಗ್ಯವನ್ನು ಹದಗೆಡಿಸಬಹುದು. ಹೀಗಾಗಿ ಈ ರೀತಿ ನಡವಳಿಕೆ, ಅವರಿಗೆ ಕಲಿಸುವ ವಿಚಾರಗಳ ಬಗ್ಗೆ ತುಸು ಎಚ್ಚರವಾಗಿರಬೇಕು, ಅವು ಯಾವೆಲ್ಲಾ ಎಂದು ನೋಡುವುದಾದರೆ..
ಸದಾ ಮೊಬೈಲ್‌, ಗೇಮ್‌ ಎಂದು ಮುಳುಗಿರುವುದು
- ಈಗಿನ ಮಕ್ಕಳ ಪೋಷಕರ ದೊಡ್ಡ ದೂರು ಅಥವಾ ತಕರಾರು ಎಂದರೆ ನಮ್ಮ ಮಗ/ ಮಗಳು ಯಾವಾಗಲೂ ಮೊಬೈಲ್‌ ನೋಡುತ್ತಾರೆ, ಗೇಮ್‌ ಆಡುತ್ತಿರುತ್ತಾರೆ. ಊಟ, ತಿಂಡಿಗೆ ಕರೆದರೂ ತಮ್ಮದೇ ಲೋಕದಲ್ಲಿ ಮುಳುಗಿರುತ್ತಾರೆ ಎನ್ನುವುದು.
- ಈ ರೀತಿ ಅಭ್ಯಾಸ ಒಳ್ಳೆಯದಲ್ಲ. ಆದಷ್ಟು ಮಕ್ಕಳನ್ನು ಗ್ಯಾಜೆಟ್‌ಗಳಿಂದ ದೂರವಿರಿಸಿ. ಅದಕ್ಕಾಗಿ ನೀವು ನಿಮ್ಮೊಂದಿಗೆ ಮನೆಕೆಲಸದಲ್ಲಿ ತೊಡಗಿಸಿಕೊಳ್ಳಿ. ಗಾರ್ಡನಿಂಗ್‌ ಅಭ್ಯಾಸ, ಇತರ ಕರಕುಶಲ ಕಲೆಗಳನ್ನು ಮಕ್ಕಳಿಗೆ ಕಲಿಸಿ.
ಆಹಾರದ ಮೇಲೆ ಗಮನವಿರಲಿ
- ಸದಾ ಪಾನಿ ಪುರಿ, ಪಿಜ್ಜಾ, ಬರ್ಗರ್‌ನಂತಹ ಆಹಾರಗಳ ಸೇವನೆಗೆ ಅವಕಾಶ ನೀಡಬೇಡಿ. ಆದಷ್ಟು ಮನೆಯಲ್ಲಿ ತಯಾರಿಸಿದ ಪೌಷ್ಟಿಕ ಆಹಾರಗಳನ್ನು ಸೇವಿಸುವಂತೆ ನೋಡಿಕೊಳ್ಳಿ. ನೀವು ಮನೆಯಲ್ಲಿ ಇಲ್ಲದೇ ಇದ್ದಾಗ ಅಥವಾ ಅನಿವಾರ್ಯ ಸಂದರ್ಭಗಳಲ್ಲಿ ಹೊರಗಿನ ತಿಂಡಿಗೆ ಅವಕಾಶ ನೀಡಿ.
- ಹಣ್ಣು, ತರಕಾರಿ, ಮೊಟ್ಟೆ ಈ ರೀತಿಯ ಪೋಷಕಾಂಶಯುಕ್ತ ಆಹಾರವನ್ನು ಮಕ್ಕಳಿಗೆ ನೀಡಿ. ಬೆಳೆಯುವ ಮಕ್ಕಳಿಗೆ ಹೆಚ್ಚು ಪೋಷಕಾಂಶದ ಅಗತ್ಯವಿರುತ್ತದೆ. ಅದು ಸರಿಯಾಗಿ ಸಿಗದೇ ಇದ್ದರೆ ಅದುವೇ ಮುಂದೆ ವಿಟಮಿನ್‌ಗಳ ಕೊರತೆ, ಕಾಯಿಲೆಗಳಿಗೆ ಒಳಗಾಗುವ ಸಂದರ್ಭ ಬರುವಂತೆ ಮಾಡಬಹುದು.
ಒಂಟಿಯಾಗಿರುತ್ತಾರಾ ಎಂದು ನೋಡಿ
- ಮಕ್ಕಳು ಎಂದರೆ ಸದಾ ಚಟುವಟಿಕೆಯಿಂದ ಕೂಡಿರಬೇಕು. ಆಟ, ಮಾತು ಎಂದು ಆಕ್ಟಿವ್‌ ಆಗಿದ್ದರೆ ಮಾತ್ರ ಚೆಂದ. ಅದರ ಬದಲಾಗಿ ಒಂಟಿಯಾಗಿ ಕುಳಿತಿರುತ್ತಾರೆ ಅಂದರೆ ಖಂಡಿತವಾಗಿಯೂ ನಿಮ್ಮ ಸಹಾಯ ಅವರಿಗೆ ಅಗತ್ಯವಿದೆ ಎಂದರ್ಥ.
- ಅಂತಹ ಸಂದರ್ಭಗಳಲ್ಲಿ ಸಮಾಧಾನವಾಗಿ ಕೇಳಿ. ಅವರ ಗೊಂದಲ, ಬೇಸರದ ವಿಚಾರಗಳನ್ನು ಹಂಚಿಕೊಳ್ಳಲು ಅವಕಾಶ ನೀಡಿ. ಮನೆಯವರು ನಮ್ಮ ಮಾತನ್ನು ಕೇಳುತ್ತಾರೆ ಎನ್ನುವ ಭರವಸೆ ಅವರಲ್ಲಿ ಬರುವಂತೆ ನೋಡಿಕೊಳ್ಳಿ.
ಕೇಳಿದ್ದನ್ನೆಲ್ಲಾ ಕೊಡಿಸಬೇಡಿ
- ಮಕ್ಕಳು ಹಠ ಮಾಡುತ್ತಾರೆ, ಬೇಸರ ಮಾಡಿಕೊಳ್ಳುತ್ತಾರೆ ಎಂದು ಕೇಳಿದ್ದನ್ನೆಲ್ಲಾ ಕೊಡಿಸುವ ತರಾತುರಿಗೆ ಬೀಳಬೇಡಿ. ಇದರಿಂದ ಅವರಿಗೆ ವಸ್ತುವಿನ ಬೆಲೆ ತಿಳಿಯುವುದಿಲ್ಲ. ಜೊತೆಗೆ ಜವಾಬ್ದಾರಿ ಎಂದರೇನು, ಅದನ್ನು ಪಡೆಯಲು ನೀಡುವ ಹಣಕ್ಕೆ ಎಷ್ಟು ಕಷ್ಟಪಡಬೇಕು ಎನ್ನುವ ಸಣ್ಣ ಅರಿವೂ ಅವರಿಗೆ ಇರುವುದಿಲ್ಲ.
- ಅವರು ಕೇಳಿದ ವಸ್ತುಗಳಲ್ಲಿ ತೀರಾ ಅಗತ್ಯವಿರುವ ವಸ್ತುಗಳನ್ನು ಮಾತ್ರ ಕೊಡಿಸಿ. ಅವರಿಗೆ ಆ ಕ್ಷಣಕ್ಕೆ ಬೇಸರವೆನಿಸಬಹುದು. ಆದರೆ ಅದು ಮುಂದೆ ಖಂಡಿತಾ ಅರಿವಿಗೆ ಬರುತ್ತದೆ.
ಹಿರಿಯರನ್ನು ಗೌರವವಿಸುವುದನ್ನು ಕಲಿಸಿ
- ಮೊದಲೆಲ್ಲಾ ಮನೆಗೆ ಯಾರಾದರೂ ಹಿರಿಯರು ಬಂದರೆ ಎದ್ದು ನಿಂತು ಗೌರವ ನೀಡುತ್ತಿದ್ದರು. ಆದರೆ ಈಗಿನ ಮಕ್ಕಳು ಕಿವಿಯಲ್ಲಿಯರುವ ಇಯರ್‌ ಫೋನ್‌ ತೆಗೆದು ನಕ್ಕರೆ ಅದುವೇ ಗೌರವ ಎನ್ನುವ ಸ್ಥಿತಿ ಎದುರಾಗಿದೆ.
- ಇದು ಸಂಸ್ಕೃತಿಯಲ್ಲ. ಹಿರಿಯರನ್ನು ಕಂಡಾಗ ಕೊನೆ ಪಕ್ಷ ನಗು ಮುಖದಿಂದ ಮಾತನಾಡುವ ಅಭ್ಯಾಸವನ್ನು ಕಲಿಸಿ. ದೇವರಿಗೆ ನಮಸ್ಕರಿಸುವುದು, ಹಬ್ಬಗಳಲ್ಲಿ ಬಾಗಿಯಾಗುವುದು, ಸಂಪ್ರದಾಯಗಳನ್ನು ಪಾಲಿಸುವ ಗುಣಗಳನ್ನು ಚಿಕ್ಕಂದಿನಿಂದಲೇ ಕಲಿಸಿ. ಅವು ಮಕ್ಕಳಿಗೆ ಜೀವನದ ಮಾರ್ಗವನ್ನು ತೋರಿಸುತ್ತವೆ.
ಸಂಗ್ರಹ : ಎಸ್.ಬಿ ನೆಲ್ಯಾಡಿ
ಮೂಲ: ವಿ ಕೆ
