ಎಷ್ಟು ಬಳಸುತ್ತೀರೋ ಅಷ್ಟು ಆರೋಗ್ಯಕಾರಿ ಈ ಬಸಳೆ ಸೊಪ್ಪು
ಹಸಿರು ತರಕಾರಿಗಳ ಪೈಕಿ ಒಂದಾದ ಬಸಳೆ ಸೊಪ್ಪು ಆರೋಗ್ಯಕ್ಕೆ ಹೆಚ್ಚು ಪ್ರಯೋಜನ ನೀಡುತ್ತದೆ. ಬಸಳೆ ಸೊಪ್ಪು ಆರೋಗ್ಯಕ್ಕೆಷ್ಟು ಒಳ್ಳೆಯದು ಎನ್ನುವ ಮಾಹಿತಿ ಇಲ್ಲಿದೆ ನೋಡಿ.
ಸೊಪ್ಪುಗಳು ನಮ್ಮ ಆರೋಗ್ಯ ವೃದ್ಧಿಸುವಲ್ಲಿ ಮಹತ್ವದ ಪಾತ್ರವಹಿಸುತ್ತವೆ. ಹೀಗಾಗಿ ಪ್ರತಿದಿನ ಸೊಪ್ಪುಗಳ ಬಳಕೆ ನಮ್ಮ ಆಹಾರದಲ್ಲಿದ್ದರೆ ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನು ಪಡೆಯಬಹುದಾಗಿದೆ.
ಅಂತಹ ಸೊಪ್ಪುಗಳಲ್ಲಿ ಬಸಳೆ ಸೊಪ್ಪು ಮುಂಚೂಣಿಯಲ್ಲಿ ಸಿಗುತ್ತದೆ. ಹಳ್ಳಿಗಳಲ್ಲಿ ಸಾಮಾನ್ಯವಾಗಿ ಕಮಡುಬರುವ ಬಸಳೆ ಸೊಪ್ಪು, ಪೇಟೆಗಳಲ್ಲಿ ಸಣ್ಣ ಪಾಟ್‌ನಲ್ಲಿಯೂ ಬೆಳಸಬಹುದಾಗಿದೆ. ಲೋಳೆಯಂತಹ ಗುಣ ಹೊಂದಿರುವ ಈ ಬಸಳೆಯನ್ನು ಬಳಸಿದಷ್ಟೂ ಆರೋಗ್ಯಕ್ಕೆ ಪ್ರಯೋಜನಗಳು ಸಿಗುತ್ತವೆ. ಈ ಲೇಖನದಲ್ಲಿ ತಜ್ಞ ವೈದ್ಯೆ ಡಾ. ಅ.ರು. ಅವರು ಬಸಳೆ ಹೇಗೆಲ್ಲಾ ಬಳಕೆಯಾಗುತ್ತದೆ ಎನ್ನುವುದನ್ನು ತಿಳಿಸಿದ್ದಾರೆ ನೋಡೋಣ.
ಹೃದಯದ ಆರೋಗ್ಯಕ್ಕೆ
- ಬಸಳೆ ಎಲೆಗಳು ಪೊಟ್ಯಾಸಿಯಮ್, ಮ್ಯಾಂಗನೀಸ್, ಕ್ಯಾಲ್ಸಿಯಂ, ಮೆಗ್ನೀಸಿಯಮ್ ಮತ್ತು ತಾಮ್ರದಂತಹ ಖನಿಜಗಳನ್ನು ಗಣನೀಯ ಪ್ರಮಾಣದಲ್ಲಿ ಹೊಂದಿರುತ್ತವೆ. ನಮ್ಮ ದೇಹಕ್ಕೆ ಮುಖ್ಯವಾಗಿ ಸರಿಯಾದ ಕಾರ್ಯ ಮತ್ತು ಪರಿಣಾಮಕಾರಿ ರಕ್ತಪರಿಚಲನಾ ವ್ಯವಸ್ಥೆಗೆ ಪೊಟ್ಯಾಸಿಯಮ್ ಅಗತ್ಯವಿರುತ್ತದೆ. ಪೊಟ್ಯಾಸಿಯಮ್ ಉಪ್ಪಿನ ಸೇವನೆಯ ಸಣ್ಣ ಪರಿಣಾಮಗಳನ್ನು ಕಡಿಮೆಗೊಳಿಸಿ ರಕ್ತದೊತ್ತಡವನ್ನು ಸಾಮಾನ್ಯ ಮಟ್ಟಕ್ಕೆ ತರುತ್ತದೆ.
- ಹೀಗಾಗಿ ಹೃದಯಕ್ಕೆ ರಕ್ತದ ಹರಿವನ್ನು ಸುಧಾರಿಸಿ, ಉತ್ತಮವಾಗಿ ಕಾರ್ಯ ನಿರ್ವಹಿಸುವಂತೆ ಮಾಡುತ್ತದೆ. ಬಸಳೆ ಸೊಪ್ಪು ಹೃದಯವನ್ನು ಆರೋಗ್ಯಯುತವಾಗಿರುವಂತೆ ನೋಡಿಕೊಳ್ಳುತ್ತದೆ.
ಜೀರ್ಣಕ್ರಿಯೆಯನ್ನು ಉತ್ತಮವಾಗಿಸುತ್ತದೆ
- ಬಸಳೆ ಸೊಪ್ಪಿನಲ್ಲಿ ಉತ್ತಮ ಪ್ರಮಾಣದ ಫೈಬರ್‌ ಅಂಶ ಅಡಕವಾಗಿದೆ. ಅಲ್ಲದೆ ಹೇರಳವಾದ ನಾರಿನಾಂಶವಿದೆ. ಹೀಗಾಗಿ ಸೇವಿಸಿದ ಆಹಾರ ಉತ್ತಮವಾಗಿ ಜೀರ್ಣವಾಗುವಂತೆ ಬಸಳೆ ಸೊಪ್ಪು ಮಾಡುತ್ತದೆ.
- ಬಸಳೆ ಸೊಪ್ಪಿನ ರಸವನ್ನು ತೆಗೆದು ಅಥವಾ ಜ್ಯೂಸ್‌ ರೀತಿಯಲ್ಲಿ ಸೇವನೆ ಮಾಡಬಹುದು. ಇದರಿಂದಾಗಿ ಜೀರ್ಣಕ್ರಿಯೆ ಉತ್ತಮವಾಗಿ ಆಗುತ್ತದೆ. ಅಲ್ಲದೆ ಹೊಟ್ಟೆಯನ್ನೂ ಆರೋಗ್ಯವಾಗಿರಿಸಿಕೊಳ್ಳಲು ಬಸಳೆ ಸೊಪ್ಪು ಸಹಾಯ ಮಾಡುತ್ತದೆ.
ಮೂಳೆಗಳನ್ನು ಬಲಪಡಿಸುತ್ತದೆ
- ಮೂಳೆಯ ಬಲಕ್ಕೆ ಕ್ಯಾಲ್ಸಿಯಂ ಮತ್ತು ಮೆಗ್ನೀಸಿಯಮ್ ಎರಡೂ ಅವಶ್ಯಕ. ಬಲವಾದ ಮೂಳೆಗಳಿಗೆ ಕ್ಯಾಲ್ಸಿಯಂ ಅಗತ್ಯವಿದ್ದರೂ, ದೇಹದಲ್ಲಿ ಕ್ಯಾಲ್ಸಿಯಂ ಅನ್ನು ಸರಿಯಾಗಿ ಹೀರಿಕೊಳ್ಳಲು ಮೆಗ್ನೀಸಿಯಮ್ ಅವಶ್ಯಕವಾಗಿದೆ.
- ಬಸಳೆ ಸೊಪ್ಪಿನಲ್ಲಿ ಸಮೃದ್ಧವಾದ ಕ್ಯಾಲ್ಸಿಯಂ ಮತ್ತು ಮೆಗ್ನೀಸಿಯಮ್ ಕಂಡುಬರುವುದರಿಂದ ಇದು ಮೂಳೆಗಳಿಗೆ ಅಗತ್ಯವಾದ ಶಕ್ತಿಯನ್ನು ನೀಡುತ್ತದೆ. ಹೀಗಾಗಿ ಇದು ಮಕ್ಕಳಿಂದ ಹಿಡಿದು ವಯಸ್ಸಾದವರವರೆಗೂ ಒಳ್ಳೆಯದು.
ಬಾಯಿಯ ಹುಣ್ಣು
- ಕೆಲವೊಮ್ಮೆ ದೇಹದಲ್ಲಿ ಉಷ್ಣಾಂಶ ಹೆಚ್ಚಾದರೆ ಬಾಯಿಯಲ್ಲಿ ಗುಳ್ಳೆಗಳಾಗುತ್ತವೆ. ಸಿಕ್ಕಾಪಟ್ಟೆ ಉರಿ ನೋವಿನಿಂದ ಕೂಡಿರುವ ಈ ಗುಳ್ಳೆಗಳು ಆಹಾರ ಸೇವಿಸಲೂ ಕಷ್ಟ ನೀಡುತ್ತದೆ. ಅಂತಹ ಸಂದರ್ಭದಲ್ಲಿ ಬಸಳೆ ಸೊಪ್ಪು ನಿಮ್ಮ ಸಹಾಯಕ್ಕೆ ಬರುತ್ತದೆ.
- ಬಸಳೆ ಸೊಪ್ಪಿನ ರಸ ತೆಗೆದು ಅದನ್ನು ಗುಳ್ಳೆಗೆ ಹಚ್ಚಬಹುದು. ಅಥವಾ ಹಸಿಯಾದ ಬಸಳೆ ಸೊಪ್ಪನ್ನು ಬಾಯಿಗೆ ಹಾಕಿ ಜಗಿಯುವುದರಿಂದ ಅದರಲ್ಲಿರುವ ಲೋಳೆ ಅಂಶ ಬಾಯಿಹುಣ್ಣನ್ನು ನಿವಾರಿಸುತ್ತದೆ.
ಉತ್ತಮ ನಿದ್ದೆಗೆ
- ಬಸಳೆ ಸೊಪ್ಪು ಸಾಕಷ್ಟು ಪ್ರಮಾಣದ ಮೆಗ್ನೀಸಿಯಮ್ ಅನ್ನು ಪೂರೈಸುತ್ತದೆ, ಇದು ನಿದ್ದೆಯ ಕೊರತೆಯಿಂದಾಗಿ ಒತ್ತಡಕ್ಕೊಳಗಾದ ಸ್ನಾಯುಗಳನ್ನು ವಿಶ್ರಾಂತಿ ಮಾಡಲು ಅಗತ್ಯವಾದ ಖನಿಜವಾಗಿದೆ. ಸ್ನಾಯುಗಳು ವಿಶ್ರಾಂತಿಗೆ ಒಳಗಾದಾಗ, ದೇಹವು ಆರಾಮದಾಯಕವಾಗಿ ನಿದ್ದೆಗೆ ಜಾರುತ್ತದೆ.
- ಬಸಳೆ ಸೊಪ್ಪನ್ನು ಬಳಸುವುದರಿಂದ ನಿದ್ರಾಹೀನತೆ ಸಮಸ್ಯೆಯನ್ನೂ ಹೊಡೆದೋಡಿಸಬಹುದು. ಅಲ್ಲದೆ ದೇಹದಲ್ಲಿ ರಕ್ತಸಂಚಾರವನ್ನು ಉತ್ತಮವಾಗಿಸಿ ಆರಾಮವಾಗಿ ನಿದ್ದೆ ಬರುವಂತೆ ಮಾಡುತ್ತದೆ.
ಸಂಗ್ರಹ : ಎಸ್.ಬಿ ನೆಲ್ಯಾಡಿ
ಮೂಲ: ವಿ ಕೆ
