ತೊಜಂಕ್ ತೊಪ್ಪುದ ಬಗ್ಗೆ ಎಚ್ಚಾದ್ ಪನ್ಪುನ ಅಗತ್ಯ ಇಜ್ಜಿ. ತುಲುನಾಡ್ದ ಮಾತೆರೆಗ್ಲಾ ನೆತ್ತ ಪರಿಚಯ ಉಂಡು.ಈ ತೊಪ್ಪುನು ಬೇತೆ ಬೇತೆ ಉಚ್ಚಾರೊಡು ಮುಲ್ತ ಜನಕುಲು ಲೆಪ್ಪುವೆರ್. ತೊಜಂಕ್, ಸೊಜಂಕ್, ಹೊಜಂಕ್ ,ತುಜಂಕ್ ಇಂಚ ಮಾತ ಪನ್ಪೆರ್.
ತುಜಂಕ್ ಸೊಪ್ಪು ಬಾರಿ ಬಾರಿ ತಂಪು ಪನ್ಪೆರ್ ದಿಂಜ ಜನ. ಅಂಚೆನೆ ಕೆಲವೆರ್ ಅವು ಉಸ್ನದ ತೊಪ್ಪು ಪಂದ್ಲಾ ಪನ್ಪೆರ್. ಆಟಿ ತಿಂಗೊಲುಡು ತಿಂಡ ಎಡ್ಡೆಗೆ ಪಂದ್ಲಾ ಒಂತೆ ಜನ ಪನ್ಪೆರ್.ಇತ್ತೆ ಮಾತೊ ಬಾಯಿ ರುಚಿಕ್ಕ್ ಈ ತೊಪ್ಪುದ ಬೇತೆ ಬೇತೆ ತಿನಸ್ ಮಲ್ತ್ ತಿನ್ಪೆರ್.ಆಂಡ ದುಂಬುದ ಕಾಲೊಡು ಸೀಕ್ ಸಂಕಡ ಬರಂದಿ ಲೆಕೊ ತಿನೊಂದು ಇತ್ತೆರ್.
ಒಂಜಿ ಐವ ವರ್ಸದ ಪಿರವುಗು ಪೋಂಡ ಆ ಕಾಲೊಡು ಈ ತೊಪ್ಪುನು ಎಂಚ ಅಡ್ತೊಂದು ಇತ್ತೆರ್ ಪಂದ್ ತೆರಿದ್ ಬರ್ಪುಂಡು.ಆನಿ ಈ ತೊಪ್ಪುದ ಒಟ್ಟುಗು ಬೆಯಿಪಾಯಿನ ಪೆಲತ್ತರಿನ್ ಪೊಡಿ ಮಲ್ತ್ ಬೆರಕೆ ಪಾಡೊಂದು ಇತ್ತೆರ್.ಅಂಚೆನೆ ಬೆಯಿಪಾಯಿನ ಪದೆಂಗಿನ್ ಬೆರಕೆ ಪಾಡೊಂದು ಇತ್ತೆರ್.ಅವ್ವೇ ರೀತಿಡ್ ಕಜೆ ಉರ್ಪೆಲ್ ಅರಿನ್ ಪೊತ್ತುದು ಪೊಡಿ ಮಲ್ತ್ ಆಜಾಯಿನ ತೊಪ್ಪುಗು ಬೆರಕೆ ಪಾಡೊಂದು ಇತ್ತೆರ್. ಉಂದು ಮಾತೊ ತೂನಗ ತುಜಂಕ್ ಉಸ್ನದ ಸೊಪ್ಪು ಪಂದ್ ತೋಜಿದ್ ಬರ್ಪುಂಡು.ಅಂಚೆನೆ ಬೇಗನೆ ನುರಿಯುನ ನುರ್ಗೆ ಮರತ್ತ ತಪ್ಪುನು ಕಜಿಪು ಮಲ್ಪುನಗ ಉಂದು ಮಾತೊ ಬೆರಕೆ ಪಾಡ್ದೇ ಕಜಿಪು ಮಲ್ಪುವೆರ್.ಉಂದೆನ್ ಮಾತೊ ತೂನಗ ನುರ್ಗೆ ತೊಪ್ಪುಲಾ, ತುಜಂಕ್ ತೊಪ್ಪುಲಾ ರಡ್ಡಲಾ ಉಸ್ನದ ತೊಪ್ಪು ಪಂದೇ ತೋಜಿದ್ ಬರ್ಪುಂಡು.ತೂನಗ ಈ ತೊಪ್ಪುಲು ಲತ್ತ್ ಲತ್ತ್ ಆದ್ ಮೆದುಮೆದು ಆದ್ ತೋಜಿಂಡಲಾ ಉಂದು ಉಸ್ನದ ತೊಪ್ಪುಲು ಆದುಂಡು.ಉಸ್ನ ತಗ್ಗವರೆ ಐಕ್ ಬೆರಕೆ ಪಾಡ್ದ್ ತಿನೊಂದು ಇತ್ತೆರ್.
ತುಜಂಕ್ದ ತಪ್ಪು ಉಸ್ನದವು ಪಂದ್ ಬಲವಾದ್ ಪನರೆ ಐತ್ತ ಪುದರೇ ಯಾವು.ಈ ತಪ್ಪುದ ಮೂಲ ಪುದರ್ “ತುಜಂಕ್”.ಈ ಪದೊಟ್ಟು ರಡ್ಡ್ ಸಬ್ದೊಲು ಒಟ್ಟಾದ್ ಉಂಡು.ಅವು “ತೂ” ಬೊಕ್ಕ “ಜಂಕ್”(ಜಂಗ್).ತೂವು” (ಬೆಂಕಿ) ಸಬ್ದೊನು ಎಲ್ಯ ಮಲ್ತ್ “ತು” ಪಂತೆರ್.”ಜಂಕ್” ಅತ್ತುಡ “ಜಂಗ್”ಪಂಡ ಜಂಕ್ ಕೊಡ್ಪುನು.ಸೋಂಕು ಆದ್ ಬೂಸ್ಟ್ ಫಂಗಸ್ ಪತ್ತುನು.”ಪೂಂಕೆ” ಕೊಡ್ಯುನು. ಈ ತೊಪ್ಪು ತೂ ಬರ್ಪುನವು ಉಸ್ನದವು ಪಂದ್ ಪುದರ್ಡೇ ತೆರ್ಪಾದೆರ್ ನಮನ ಪೂರ್ವಜೆರ್.ಅವೆನ್ ತಿನ್ನಗ ಐಕ್ ತಂಪುದ ವಸ್ತುಲೆನ್ ಬೆರಕೆ ಮಲ್ಪರೆ ಪಂತೆರ್.ತೂವು”ತೇವು” ಆಯಿ ಲೆಕೊನೆ ಸೂವು “ಸೇವು”ಆಯಿ ಲೆಕೊನೆ ತೂವು ಜಂಕ್ “ತೊಜಂಕ್” ಆಂಡ್.ಅಂಚೆನೆ ಸೂವು ಜಂಕ್ “ಸೊಜಂಕ್”ಆಂಡ್.
ತುಲುನಾಡ್ಡ್ ರಡ್ಡೇ ಕಾಲ.ಅವು ಅರೆಗಲ ಬೊಕ್ಕ ಮರಿಯಲ.ವರ್ಸದ ಎಡ್ಮ ತಿಂಗೊಲು ಮುಲ್ಪ ಮರಿಯಲಗೆ ಪಂದ್ ಪಿರಿಯಾಕುಲು ಪಂತೆರ್. ಬರ್ಸೊಗು ನಮನ ಜೀವದ ಉಲಾಯಿ ತಂಪು ಸೀತ ಆದ್ ಅಲ್ಪ ಅಲ್ಪ ಪೂಂಕೆ ಕೊಡ್ಡಿದ್ ಸೋಂಕು ಆದ್ ಸೀಕ್ ಸಂಕಡ ಬರ್ಪುಂಡು.ಜೀವದ ಉಲಾಯಿ ಜಂಗ್(ಜಂಕ್)ಪತ್ತಿನವೆನ್ ಕೆರೆತ್ತ್ ದೆಪ್ಪರೆ,ಪೊತ್ತದ್ ದೆಪ್ಪರೆ ಈ ಉಸ್ನದ ತೊಪ್ಪು ತುಜಂಕ್ ತಿನೊಡು ಪಂತೆರ್ ನಮನ ಪಿರಿಯಾಕುಲು.ಈ ತಜಂಕ್ ತೊಪ್ಪು,ನುರ್ಗೆ ತೊಪ್ಪುಡು ಬೋಡಿನಾತ್ ನಾರ್ದ ಅಂಸ ಉಂಡು.ಅವು ಜೀವದ ಉಲಾಯಿ ಪತ್ತ್ ಇತ್ತಿನ ಪೂಂಕೆ, ಬೂಸ್ಟ್, ಫಂಗಸ್ ನು ಮಾತ ಉರ್ದುದು ಕೆರೆತ್ತ್ ಸೋಂಕು ಸೀಕ್ನ್ ಸುಮಾರ್ ಮಲ್ಪುಂಡು.ನಮ ಜೀವದ ಪಿದಾಯಿ ಪಂಡ ಚರ್ಮೊಡು ಕುರೆಟ್ಟ್ ಜಂಗ್ ಪತ್ತುದು ಸೋಂಕು ಇತ್ತ್ಂಡ ಜಂಗಮೆ (ಜಂಗ್+ ಅಮೆ=ಕುರೆಟ್ಟ್ ಪತ್ತಿನ ಜಾಗೆ)ತೊಪ್ಪುಡು ಕೆರೆತ್ತ್ ಉರ್ದುದು ದೆಪ್ಪುವೆರ್.ಈ ತಪ್ಪುನು ಕುದ್ಕ ತೊಪ್ಪು, ಪುರುಂಗು ಪುಚ್ಚೆದ ತಪ್ಪು ಪಂದ್ಲಾ ಪನ್ಪೆರ್.ಜಂಗಮೆ ತೊಪ್ಪು ಬೊಕ್ಕ ತೊಜಂಕ್ ಸೊಪ್ಪುದ ಬನ್ನ ಮಂಜಲ್ ಆದೇ ಉಂಡು.ಜಂಗಮೆ ತಪ್ಪು ದರಗ್ ಗಟ್ಟಿ ಆದ್ ಆದುಂಡು.
ತೊಜಂಕ್ ದೈತ್ತ ನುಂಗುದುನ ಬಿತ್ತುನು ಜನ ಕುಟ್ಟುದು ಕಸಾಯ ಮಲ್ತ್ ಪರೊಂದು ಇತ್ತೆರ್.ಅಂಚೆನೆ ನೆತ್ತ ನುಂಗಿನ ಬಿತ್ತುನು ನೀರ್ಡ್ ನನೆತುದು ಕಡೆದ್ ಎರ್ಲೆಗ್ ಕೊರೊಂದು ಇತ್ತೆರ್ ಪಂದ್ ಪೂರ್ವಿಕೆರ್ ಪಂತೆರ್.ಎರ್ಲೆನ ಜೀವದ ಉಲಾಯಿದ ಪೂಂಕೆ ಪತ್ತಿನ ಸೋಂಕು ಸೀಕ್ ಸುಮಾರ್ ಆಪುಂಡುಗೇ ಪಂದ್ಲಾ ಪಂತೆರ್.ಒಟ್ಟಾರೆ ತೂಂಡ ತುಜಂಕ್ ತೊಪ್ಪು , ನೆತ್ತ ಬಿತ್ತ್ ಪೂರಲಾ ಉಸ್ನದ ಸೊತ್ತುಲೇ ಆದುಂಡು.ಸೀತ ತಂಪುಡು ಬರ್ಪಿನ ಸೀಕ್ ಸಂಕಟೊಗು ಮರ್ದ್ ಆದುಂಡು ಈ ತೊಪ್ಪು ತೊಜಂಕ್ ಸೊಜಂಕ್ ಸೊಪ್ಪು.ಒಟ್ಟುಡು “ತೊಜಂಕ್” ಪನ್ಪಿ ಪುದರ್ಡ್ ಉಂಡು ಐತ್ತ ಗುಣ ಲಕ್ಷಣ ಬೊಕ್ಕ ಐತ್ತ ಪ್ರಯೋಜನೊಲು.
ಐ.ಗೋವಿಂದ ಭಂಡಾರಿ, ಕಾರ್ಲ.
( ನಿವೃತ್ತ ವಿಜಯಾಬ್ಯಾಂಕ್ ಮ್ಯಾನೇಜರ್)
