ಬೂತೊಲೆಗ್ ಆವಾರ ಕೊರ್ಪುನು ಪಂಡ ಜೀವದ ಕೋರಿನ್ ಆಹಾರದ ಲೆಕೊ ಬೂತ ಕೋಲದಾನಿ ತಿನರೆ ಕೊರ್ಪುನು.ಅಂಚೆನೆ ಬೂತ ತಂಬಿಲದಾನಿ ಕೋರಿ ಕಡ್ತುದು ಬಲಿ ಕೊರ್ಪುನು. ಆಂಡ ಮುಲ್ಪ ತುಲುವೆರ್ ಅರ್ತ ಮಲ್ತೊನೊಡು ದಾನೆ ಪಂಡ ಜೀವದ ಕೋರಿನ್ ತಿನರೆ ಕೊರ್ಪುನು ನರಮಾನಿ ಬೂತೊಗಾ ಅತ್ತ್ ಪ್ರಾನಿ ಬೂತೊಗಾ ಪಂದ್.ಅಂಚೆನೆ ತಂಬಿಲದಾನಿ ಕೋರಿ ಕಡ್ಪುನು ನರಮಾನಿ ಬೂತೊಗ ಅತ್ತ್ ಪ್ರಾನಿ ಬೂತೊಗಾ ಪಂದ್. ನರಮಾನಿ ಬೂತೊಗು ತಿನರೆ ಜೀವದ ಕೋರಿ ಕೊರಿಯರೆನೇ ಇಜ್ಜಿ. ತುಲುನಾಡ್ ಬೂತೊಲು ಪಂಡ ಪ್ರಕೃತಿ, ಮನ್ಸ ಬೂತೊಲು ಬೊಕ್ಕ ಪ್ರಾನಿ ಬೂತೊಲು ಮಾತ್ರ.ನರಮಾನಿ ಬೂತೊಲು ಪಂಡ ಒಂಜಿ ಕಾಲೊಡು ಅಕುಲು ಮನ್ಸ ಜಾತಿಡೇ ಇತ್ತಿನಕುಲು.ಬೂತೊಲೆಡ್ ಕೆಲವೆರ್ ಬಜೀ ಕಾಯಿ ಕಜಿಪು ತಿಂತಿನಕುಲೇ ಇಪ್ಪೆರ್.ಕೆಲವೆರ್ ಕಾಯಿ ಕಜಿಪುದ ಒಟ್ಟುಗು ಮೀನ್ ಮಾಸ ತಿಂತಿನಕುಲಾ ಇಪ್ಪೆರ್.ಅಂಚೆನೆ ಪ್ರಾನಿ ಬೂತೊಲೆಡ್ ಕೆಲವು ಬಜೀ ಕಾಯಿ ಕಜಿಪು ತಿನ್ಪುನವು,ಕೆಲವು ಕಾಯಿ ಕಜಿಪುದ ಒಟ್ಟುಗು ಮಾಸ ತಿನ್ಪುನವು, ಕೆಲವು ಬಜೀ ಮಾಸ ತಿನ್ಪುನವು ಉಂಡು.
ಪ್ರಕೃತಿ ಬೂತ ಬೊಕ್ಕ ಬಜೀ ಕಾಯಿ ಕಜಿಪು ತಿನ್ಪುನ ಮನ್ಸ ಬೂತಲೆಗ್ ತಂಬಿಲ ಬೊಕ್ಕ ಪನಿಯಾರ ಪಾಡ್ದ್ ಆರಾದನೆ ಮಲ್ದೆರ್.ಕಾಯಿ ಕಜಿಪು ಬೊಕ್ಕ ಮಾಸ ತಿನ್ಪುನ ಮನ್ಸ ಬೂತೊಲೆಗ್ ತಂಬಿಲ,ಪನಿಯಾರ ಬೊ ಕ್ಕ ಕೋರಿದ ಮಂಡೆ ಪೀಂಟಾದ್ ಕೆರ್ದ್ ಕಜಿಪು ಮಲ್ತ್ ಅಡು,ಅಗೆಲ್ ಬಲಸ್ದೆರ್.ಪಜ್ಜಿ ಮಾಸ ತಿನರೆ ಇಜ್ಜಿ. ಪ್ರಾನಿ ಬೂತೊಲೆಡ್ ಬಜೀ ಕಾಯಿ ಕಜಿಪು ತಿನ್ಪುನ ಪ್ರಾನಿ ಬೂತೊಲೆಗ್ ತಂಬಿಲ,ಪನಿಯಾರ ಪಾಡ್ದ್ ನಂಬುದು ಆರಾದನೆ ಮಲ್ದೆರ್.ಕಾಯಿ ಕಜಿಪುದ ಒಟ್ಟು ಮಾಸ ತಿನ್ಪುನ ಬೊಕ್ಕ ಬಜೀ ಮಾಸನೇ ತಿನ್ಪುನ ಪ್ರಾನಿ ಬೂತೊಲೆಗ್ ಕೋರಿ ಕಡ್ತುದು ಬಲಿ ಇಜ್ಜಾ ಬೂತ ಕೋಲದಾನಿ ಜೀವದ ಕೋರಿ ಕೊರ್ದು ಆರಾದನೆ ಮಲ್ದೆರ್.ಕೋಲ ಪಂಡ ಏಸೊ ಮಾತಾ ಬೂತೊಲೆಗ್ ಇತ್ತ್ಂಡ್.ಇತ್ತೆ ಇತ್ತೆ “ಕೋಲ” ಪನ್ಪಿನವೆನ್ ಮಾಜದ್ “ಗಗ್ಗರ”ಕಟ್ಟರೆ ಸುರು ಮಲ್ದೆರ್.
ತುಲುಕಾಡ್ಡ್ ಸುರುತ್ತ ನಂಬೊಲಿಗೆದ ಆರಾದನೆ ಪಂಡ ಅವು ನಾಗರಾದನೆ. ಅವ್ವೇ ಮರಿ ಎಡ್ಡೆಂದ್ನ ಉಚ್ಚುಲೆನ ಆತ್ಮೊಲೆನ್ ಕಲ್ಲ್ ಪಾಡ್ದ್ ನಂಬುನು. ಆ ಜಾಗನೇ ನಾಗಬನ.ಮರಿ ಉಚ್ಚುಲು ಸೈತ್ಂಡ ಬನೊಟ್ಟು ಕೌಂತುದು ಕಲ್ಲ್ ಪಾಡ್ದ್ ನಂಬಿಯೆರ್. ಬೂಮಿ ಅಪ್ಪೆನ್ ಐನ್ ಜಿಡೆತ್ತ ಉಚ್ಚು ಐತ್ತ ತರೆಟ್ಟ್ ದೀದ್ ಜೀವ ರಾಸಿನ್ ಕಾಪುನ ಬೇಲೆ ಮಲ್ತೊಂದು ಉಂಡು ಪನ್ಪುನ ಬಲತ್ತ ನಂಬುಗೆ ಆನಿದ ಕಾಲದ ಜನಕುಲೆಡ ಇತ್ತ್ಂಡ್.ಐಕ್ ಎಡ್ಡೆಂದ್ನ ಉಚ್ಚುಲೆನ್ ಕೆರ್ರೇನೆ ಬಲ್ಲಿ ಪನ್ಪಿ ನಿಯಮೊನು ಕನಪ್ಪೆರ್. ಸೈತ್ಂಡ ನಾಗನ ಆತ್ಮೊನು ನಾಗಬನೊಟ್ಟು ಕಲ್ಲ್ ಪಾಡ್ದ್ ನಂಬುವೆರ್.ಆತ್ಮೊಗು ಕಲ್ಲ್ ಡ್ ನೀರ್ ದೀಪೆರ್. ತಂಬಿಲ(ತಾಂಬೂಲ-ಬಚ್ಚಿರೆ ಬಜ್ಜೇಯಿ,ಪೂವು)ದೀದ್ ದೋಸೊನು ಎಲ್ಯ ಮಟ್ಟೊಡು ಪರಿಹಾರ ಮಲ್ತೊಂದು ಬತ್ತೆರ್.ಬೊಕ್ಕದ ಕಾಲೊಡು ನಾಗಗ್ ಪನಿಯಾರ ಪಾಡ್ದ್ ಆರಾದನೆ ಮಲ್ತೆರ್. ಐಡ್ದ್ ಬೊಕ್ಕ ನಾಗಗ್ ಕೋಲಲಾ ಕೊರ್ದು ಆರಾದನೆ ಮಲ್ತೊಂದು ಬತ್ತೆರ್. ಬೂತೊಲೆ ಆರಾದನೆ ಸುರು ಆಯಿನ ದುಂಬುದ ನಾಗ ಕಲ್ಲುಲು ಮಾತ ನಾಗ ಬೆರ್ಮೆರ್ ಪಂಡೆರ್.ಪಂಡ ಬೇರ್ ಮೇರ್ ಬೆರ್ಮೆರ್ ಆತೆರ್.ಬೇರ್ ಪಂಡ ಮೂಲ ಪಂದ್ ಅರ್ಥ.ಬೂತ ಆರಾದನೆ ಸುರು ಆಯಿನ ಬೊಕ್ಕದ ನಾಗ ಕಲ್ಲುಲೆನ್ ನಾಗೆ ಪಂದ್ ಲೆತ್ತೆರ್. ಮೂಲದ ಕಲ್ಲುಲೆನ್ ಜೆಪುಡಾದ್ ನಂಬುದೆರ್.ಬೊಕ್ಕ ದ ಕಲ್ಲುಲೆನ್ ನಿದ್ಪ ದೀತೆರ್.
ತುಲುಕಾಡ್ಡ್ ಅಪಗ ಬುಲೆವೊಂದು ಇತ್ತಿನಿ ಪಂಡ ಕುಡು ಮಾತ್ರ. ಏತೋ ವರ್ಸ ನಮನ ಪೂರ್ವಿಕೆರ್ ಮುಲ್ಪ ಕುಡು,ಕೆರೆಂಗ್, ಕುಕ್ಕು,ಗುಜ್ಜೆ ಪೆಲಕಾಯಿ ತಿಂದೇ ಬದುಕೊಂದು ಇತ್ತೆರ್.ದಾಯೆ ಪಂಡ ಮುಲ್ಪ ಕೊಡೀ ಕಡೆ ನೀರ್ದ ಪಟ್ಲ ಪ್ರದೇಸನೇ ದಿಂಜಿದ್ ಇತ್ತ್ಂಡ್. ಕಂಡ ಇತ್ತಿಜಿ.ಎಡ್ಡೆಂದ್ನ ಉಚ್ಚುಲು ಇತ್ತಿ ಲೆಕೊನೇ ಪಿಲಿ ಪಂಜಿಲು ಕೊಡಿಕಡೆಲಾ ಕಂಡಾಪಟ್ಟೆ ಇತ್ತ್ಂಡ್. ತಾದಿಡ್ ನಡೊತೊಂದು ಪೋಪಿ ಲೆಕೋ ಇತ್ತಿಜಿ. ತಾಂಕಿನ ಪ್ರಾನಿಲು ಪೂರ ಪಿಲಿಕ್ಲೆನ ಬಾಯಿಗ್ ಆವಾರ ಆವೊಂದು ಇಪ್ಪುಂಡು.ಎತ್ತರದ ಜಾಗುಡು ಮಲ್ತಿನ ಕೃಷಿ ಪೂರ ಪಂಜಿಲು ಲಗಾಡಿ ದೆತ್ತೊಂದು ಇಪ್ಪುಬ. ಈ ಕಾಲೊಡು ಪಟ್ಲ ಜಾಗೆಡ್ ಬಙ ಬತ್ತ್ ಒಂಜಿ ಅರಿತ್ತ ಬುಲೆ ದೆಪ್ಪರೆ ಸುರು ಮಲ್ಪುವೆರ್.”ಕುಡು ಅರಿ ದಕ್ಕ್ ದ್ ಉಂಡಾಂಡ್ ತುಲುನಾಡ್”ಪಂಡೆರ್. ಆ ನೆನಪುಗು ಕುಡರಿ ಪೊತ್ತುದು ತಿಂದೆರ್.ಕಾಡ್ ವಾಸನೇ ಕೆಡ್ವಾಸ ಕೆಡ್ಡಸ ಆಪುಂಡು.ಪ್ರಾನಿ ಪಕ್ಕಿಲೆನ ಕಾಟ ನನಾತ್ ಜಾಸ್ತಿ ಆಪುಂಡು.
ಪಿಲಿಕ್ಲೆನ್ ಕೆರ್ಪುನ ಪೈಲ್ವಾನ್ ಒರಿ ತುಲುನಾಡ್ಡ್ ಪುಟ್ಟುವೆ.ಅಯೆ ಮೂಜಿ ಸೂನ ಕಬಕೆದ ಕೋಲುಡು ಪಿಲಿಕ್ಲೆನ್ ಪತ್ತುದು ಕೆರ್ಪೆ.ಪಿಲಿಕ್ಲೆಗ್ ನೀರ್ ಪಂಡ ಬಾರಿ ಇಸ್ಟೊ.ಐಕ್ಲೆನ ಕೋಪ ತಂಡ್ ಆಪುಂಡು. ಅಂಚ ಪಿಲಿಕ್ಲೆನ್ ನೀರ್ದ ಗುರಿಕ್ ಕಬಕೆಡ್ ಜಪುಡಾದ್ ಪಿಲಿಕ್ಲೆಗ್ ಕೋರಿ ದಕ್ಕುದು ಸುಲಬೊಡು ಪಿಲಿಕ್ಲೆನ್ ಕೆರ್ದ್ ಜನಕುಲೆನ್ ಅತ್ತಂದೆ ತಾಂಕನೆದ ಪ್ರಾನಿಲೆನ ಜೀವೊನು ಒರ್ಪುವೆ.ಅಂಚೆನೆ ಮರಟ್ಟ್ ಇತ್ತಿನ ಪಿಲಿಕ್ಲೆಗ್ ಮರತ್ತ ತಿರ್ತ್ ಕೋರಿ ಕಟ್ಟುದು ಪಿಲಿಕ್ಲೆನ್ ಜಪುಡಾದ್ ತ್ರಿಸೂಲ ಮೂಜಿ ಸೂನದ ಕಬಕೆಡ್ ಕೆರ್ಪೆ. ಊರುದ ರಕ್ಷನೆ ಮಲ್ಪುವೆ.ಪಿಲಿಕ್ಲೆನ್ ಗುರಿಗ್|ಗುಲಿಕ್ ಜಪುಡಾಯಿನ ಆಯೇನೇ ಗುಲಿಕೆ ಗುಲಿಗೆ ಆಪೆ.ಆಯೆ ಬಾರ್ನೆ ದೆತೊನ್ನ ಪೊರ್ತುಗು ಆಯನ ಗುಲಿಗೆ ತೂದೇ ಆಯೆ ಮಲ್ಲ ಜಟ್ಟಿ ಪಂದ್ ಜನಕುಲು ಪನ್ಪೆರ್.ಆಯೆ ಕಲಿ ಪರ್ದ್ ಪಿಲಿಟ್ಟ್ ಗೊಬ್ಬುನ ಕಲೆನ್ ಕಲ್ತೊಂದು ಪಿಲಿಕುಲೆನ್ ಕೆರ್ದ್ ತುಲುವೆರೆನ ರಕ್ಷಕೆ ಆಪೆ.ಆ ಕಲೆನ್ ಬೇತೆ ಜನಕುಲೆಗ್ ಕಲ್ಪಬೆ.ಗುಲಿಗೆ ಸೈತಿ ಬೊಕ್ಕ ಆಯನ ನೆನಪುಗು ಕಲ್ಲ್ ಪಾಡ್ದ್ ನಂಬುವೆರ್.ಅಂಚೆನೆ ಆಯೆ ಕೆರ್ತಿನ ಪಿಲಿಕ್ಲೆನ ನೆನಪುಗು ಆಯನ ಕಲ್ಲುದ ಕೈತಾಲ್ ಒಂತೆ ತಿರ್ತ್ ಪಿಲಿ ಕಲ್ಲ್ ಪಾಡುವೆರ್.ಅವ್ವೇ ಚಂಡಿಪಿಲಿ. ಅವೆನೇ ಪಿಲಿಚಂಡಿ ಪಂಡೆರ್.ಗುಲಿಗಗ್ ತಂಬಿಲ, ಪನಿಯಾರ ಪಾಡೊಂದು ನಂಬೊಲಿಗೆಡ್ ಆರಾದನೆ ಮಲ್ತೊಂದು ಬತ್ತೆರ್. ಪಿಲಿಕ್ಲೆನ ಆತ್ಮೊಲೆಗ್ ಕೋರಿ ಕಡ್ತುದು ಆವಾರ ಕೊರೊಂದು ಬತ್ತೆರ್.ಗುಲಿ|ಗುರಿ ತೋಡುದು ಗುರಿಟ್ಟ್ ಕೋರಿ ದೀದ್ ಪಿಲಿಕ್ಲೆಗ್ ಆಸೆ ತೋಜಿಪಾದ್ ಪಿಲಿಕ್ಲೆನ್ ಜಪುಡಾದ್ ಪಿಲಿಕ್ಲೆನ್ ಕೆರಿನಾಯೆನೇ ಗುಲಿಗೆ.ಗುಲಿಗನ ಕೋಲೊಡು ಆಯನ ಅಬತಾರೊಡ್ ಪಿಲಿಕ್ಲೆನ್ ಗಿಡಪುನ ಕೆರ್ಪುನ ನಲಿಕೆಡ್ ತೂವೊಲಿ.ಆ ಕಾಲೊಡು ಪಿಲಿ ಕೆರ್ಪುನಂಚಿನ ತಾಕತ್ತ್ ಕಮ್ಮಿದತ್ತ್.ಆಯೆ ಮುಕ್ಕುನ ದಿಂಗುನ ಗುಲಿಗೆ ತೂದೇ ಜನಕುಲು ಆಯನ್ ಗುಲಿಗೆ ಪಂತೆರ್.ಇಂಬನ ಬೂತ ಕೋಲೊಡು ಆಯನ ಆನಿದ ಅಬತಾರ ತೂವೊಲಿ.
ಅಂಚೆನೆ ತುಲುನಾಡ್ಡ್ ಕುಡೊರಿ ಮಿಸ್ಮೆ ಪುಟ್ಟುಬೆ. ಆಯೆ ತುಲುನಾಡ್ಡ್ ಪಂಜಿಲೆನ ಉಪದ್ರೊ ತಡೆಪರೆ ಬಾರಿ ಮಲ್ಲ ಕುಸೆಲ್ದ ತಂತ್ರ ಸುಲಬದ ಉಪಾಯೊನು ನಾಡ್ ಪತ್ತುಬೆ.ಪಂಜಿಲೆಗ್ ಉರ್ಲು ದೀದ್ ಪಂಜಿಲೆನ್ ಪತ್ತುದು ಕೆರ್ಪುನ ಬೇಲೆ ಮಲ್ಪುವೆ.ಬೇತೆಕ್ಲೇಗುಲಾ ಈ ಸುಲಬದ ಜಾನ್ಮೆದ ಉಪಾಯೊನು ಪಂದ್ ಕೊರ್ಪೆ. ಆ ಕಾಲೊಡು ಈ ಉಪಾಯೊ ಸಸಾರ ಮಲ್ಪುನವು ಅತ್ತ್.ಆಯಗ್ ಆ ಕಲೆಕ್ಕ್ ಗೌರವ ಮಲ್ತುದು ಪಂಜಿಲೆನ್ ಕೆರ್ದ್ ಜನಕುಲೆಗ್ ಕೃಷಿ ಮಲ್ಪರೆ ಸಾಯ ಮಲ್ತಿನ ಆಯಗ್”ಪಂಜುರ್ಲಿ”ಪನ್ಪುನ ಪುದರ್ ದೀಪೆರ್.ಉರ್ಲು ದೀದ್ ಅಲ್ಪ ಕೋರಿನ್ ಕಟ್ಟ್ ದೀದ್ ಪಂಜಿಲೆನ್ ಆಕರ್ಸನೆ ಮಲ್ತ್ ಪಂಜಿಲೆನ ಕಾಟೊನು ತಗ್ಗವರೆ ನನಾತ್ ಉಪಾಯೊನು ಪಂದ್ ಕೊರ್ಪೆ ಪಂಜುರ್ಲಿ. ಜನಕುಲು ಮಾತೆರ್ಲಾ ಮಾನದಿಗೆ ಮಲ್ತ್ ಆಯನ್ ಕೊಂಡಾಡುವೆರ್.ಆಯೆ ಸೈತಿ ಬೊಕ್ಕ ಆಯನ ನೆನಪುಗು ಕಲ್ಲ್ ಪಾಡ್ದ್ ನಂಬುವೆರ್. ಅಂಚೆನೆ ಪಂಜಿದ ನೆನಪುಗು ಕೈತಾಲ್ಡ್ ಪಂಜಿಗ್ ಕಲ್ಲ್ ಪಾಡುವೆರ್. ಪಂಜುರ್ಲಿಗ್ ತಂಬಿಲ, ಪನಿಯಾರ ಪಾಡ್ದ್ ನಂಬೊಂದು ಬತ್ತೆರ್. ಪಂಜಿಲೆನ ಆತ್ಮೊಲೆಗ್ ಕೋರಿ ಕಡ್ತ್ ಆವಾರ ಕೊರಿಯರ್.ಇಂಬನ ಬೂತ ಕೋಲೊಡು ಆಯನ ಆನಿದ ಅಬತಾರ ತೂವೊಲಿ.
ತುಲುನಾಡ್ಡ್ ಬೊಕ್ಕದ ಕಾಲೊಡು ಬಾರಿ ಮಲ್ಲ ಮಿಸ್ಮೆದಿ ಪೊನ್ನು ಪೊಂಜೋವು ಒರ್ತಿ ಪುಟ್ಟುವಲ್. ಆಲೆ ಪೆದ್ಪಾವುನಾಲ್.ಪೆದ್ಮೆದಿನ್ ತಾಂಕುನಾಲ್.ಪೆದ್ದಿ ಬಾಲೆನ್ ತಾಂಕುನಾಲ್. ಅಕುಲೆಗ್ ಬೋಡಾಯಿನ ಮರ್ದ್ ನಾಡ್ದ್ ಪತ್ತಿನಾಲ್.ಅಲೆನ್ ಪದೆತ್ತಿ ಪಂದ್ ಲೆತ್ತೆರ್.ಬೇತೆ ಪೊನ್ನುಲೆಗ್ ಪೆದ್ದವುನ,ಪೆದ್ಮೆದಿ ತಾಂಕುನ ಬಿದ್ಯೆನ್ ಪಂದ್ ಕೊರ್ಪಲ್.ಆ ಬಿದ್ಯೆನ್ ಕಲ್ಪಾದ್ ಕೊರ್ಪಲ್. ಆತೆ ಅತ್ತಂದೆ ಆಲ್ ಉಚ್ಚು ತುಚ್ಚಿಂಡ ಜುಂಬುದು ಜುಮ್ಮುದು ಇಸ ಒಯಿತುದು ಜನಕುಲೆನ್ ಬದ್ಕಾವೊಂದು ಉಪ್ಪುವಲ್.ಅಕುಲೆಗ್ ಇಸತ್ತ ಮರ್ದ್ ಕೊರ್ಪಲ್.ಇಸತ್ತ ಮರ್ದುನು ಪಂದ್ ಕೊರ್ಪಲ್. ಜನಕುಲು ಅಲೆನ್ ಜುಮಾಯಿ ಪೊನ್ನು ,ಜುಮಾಯಿ ಅಪ್ಪೆ ಪಂದ್ ಲೆತ್ತೆರ್. ಮಲ್ಲಪ್ಪೆ ಜುಮಾತಿ ಜುಮಾದಿ ಪಂಡೆರ್.ಅಲ್ ಸೈತಿ ಬೊಕ್ಕ ಅಲೆನ ನೆನಪುಗ್ ಕಲ್ಲ್ ಪಾಡ್ದ್ ನಂಬುವೆರ್.ಅಲೆಗ್ ತಂಬಿಲ,ಪನಿಯಾರ ಕೊರೊಂದು ಬತ್ತೆರ್.ಅಲೆನ ಒಟ್ಟುಗು ಇತ್ತುದು ಅಲೆಗ್ ಬೆರಿ ಸಾಯ ಕೊರೊಂದು ಇತ್ತಿನ ಬಂಟೆರೆನ್ ಅಲೆ ಒಟ್ಟುಗು ನಂಬುದು ಅಲೆ ಒಟ್ಟುಗೇ ತಂಬಿಲ ಪನಿಯಾರ ಕೊರೊಂದು ಬತ್ತೆರ್.ಉಚ್ಚು ತುಚ್ಚಿನ ಇಸೊನ ಜುಮ್ಮುದು ಜನಕುಲೆನ್ ಬದ್ಕಾಯಿನಾಲೇ ಜುಮಾದಿ ಆತಲ್.
ಆ ಕಾಲೊಡು ಇತ್ತಿನ ನನೊರಿ ಬಾರಿ ಮಲ್ಲ ಜವನೆ ದೇಕಿದಾಯೆ ಇತ್ತೆ.ಆಯಗ್ ಸೈಂದಾಯ ಮೈಕಟ್ಟ್ ಇಪ್ಪುಂಡು.ಆಯನ್ ಮೈಸೈಂದಾಯೆ ಪಂದೇ ಜನಕುಲು ಲೆಪ್ಪುವೆರ್.ಆ ಕಾಲೊಡು ಆಯನ ಬಾರಿ ಮಲ್ಲ ಬೇಲೆ ಪಂಡ ಎರ್ಲೆನು ತಾಂಕುನ,ಕಂಡ ದಪ್ಪುನ,ಬೆನ್ನಿ ಬೆನ್ಪುನ,ಕುಡು ಬಾರ್ ಬುಲೆಪವುನ,ಕಂಡ ಬಿತ್ತುನ, ಮಾರ್ ಪಟ್ಲ ಜಾಗೆಡ್ ನೇಜಿ ಪಾಡ್ದ್ ನಡ್ಪುನ, ಕುಮೇರ್ ಜಾಗೆಡ್ ಬಿತ್ತುನ ಇಂಚ ಬೆನ್ನಿದ ಮಾತಾ ಇಚಾರೊನು ಜನಕುಲೆಗ್ ಕಲ್ಪಾವೆ.ಕಂಡೊಲೆನ್ ಗರ್ತ್ ಕೆತ್ತುದು ಮಲ್ಪುನಗ ಮುಡಾಯಿ ಪಡ್ಡಾಯಿ ದಿಕ್ಕುಗು ಉದ್ದ ದೀವೊಡು,ತೆನ್ಕಾಯಿ ಬಡಕಾಯಿ ದಿಕ್ಕುಗು ಕುದ್ಯ ದೀವೊಡು ಪನ್ಪುನ ಇಸಯೊನು ಜನಕುಲೆಗ್ ತೆರಿಪಬೆ. ಬೂಮಿನ್ ಗಲಸುನ ಜಾಗೆಡ್ ನಾಗ ಬನೊಕ್ಕು ಜಾಗ ದೀವೊಡು ಪನ್ಪುನೈನ್ ಪಂದ್ ಕೊರ್ಪೆ. ಈ ತುಲು ಮನ್ನ್ ಎಡ್ಡೆಂದ್ನ ಮರಿ ಉಚ್ಚುಲೆಗ್ ಸೇರ್ದ್ಂಡ್ ಪಂದ್ ನೆಂಪು ಮಲ್ಪುವೆ.ಮೈಸೈಂದಾಯನ್ ಎರು ಮೈಂದೆ ಪಂದ್ಲಾ ಜನಕುಲು ಲೆಪ್ಪುವೆರ್.ಎರುತ್ತ ಜೂವದ ಗಟ್ಟಿ ಮೆಯಿತಾಯೆ ಪನ್ಪುನ ನಂಬುಗೆ ಜನಕುಲೆಡ ಉಪ್ಪುಂಡು.ಮೈಸೈಂದಾಯೆ ಸೈತಿ ಬೊಕ್ಕ ಆಯನ್ ಕಲ್ಲ್ ಪಾಡ್ದ್ ನಂಬುವೆರ್. ಆಯನ ಒಟ್ಟುಗು ಆಯನ ಎರ್ಲೆನ್ಲಾ ನಂಬುವೆರ್.ಆಯನೊಟ್ಟುಗು ಎರ್ಲೆಗ್ಲಾ ತಂಬಿಲ ಪನಿಯಾರ ಪಾಡಿಯೆರ್. ಕೋಲ ಕೊರೊಂದು ಬತ್ತೆರ್.
ಗುಲಿಗೆ, ಪಂಜುರ್ಲಿ, ಜುಮಾದಿ, ಮೈಸೈಂದಾಯೆ ಮೊಕುಲು ನರಮಾನಿ ಆದಿಪ್ಪುನಗನೇ ಸುರುಕ್ಕು ಆದ್ ತುಲುನಾಡ್ಡ್ ಬೂತಾರಾದನೆನ್ ಸುರು ಮಲ್ಪುವೆರ್. ಆ ಸುರುತ್ತ ಬೂತನೇ “ಲೆಕ್ಕೆ ಸಿರಿ”.ಈ ಬೂತ ನರಮಾನಿಲಾ ಅತ್ತ್ ,ಪ್ರಾನಿಲಾ ಅತ್ತ್.ಅವು “ಬುಲೆ – ಸಲೆ”. ನಡ್ತಿನ ನೇಜಿ ಪುಲ್ಲೆ ಪುಡವೊಡು.ಪುಲ್ಲೆ ಪುಡದ್ ಸಿರಿ ಬರೊಡು.ಅಂಚೆನೆ ಬಿತ್ತಿ ಬೀಜ ಕೊಡ್ಡಿದ್ ಕೊಡಿಪು ಆವೊಡು.ಕೊಡಿಪುಡು ಸಲೆ ಪುಡಾದ್ ಸಿರಿ ಬರೊಡು.”ಲಕ್ಕ್ ಸಿರಿ” ಸಿರಿ ಪೊಲಿ ಆವೊಡು.ಕನ್ನಡ ಬಾಸೆಡ್ ಪನ್ಪುನಂಡ ಇಂಚ ಪನ್ಪೆರ್.”ಎದ್ದೇಳು ಚಿಗುರೆ. ಚಿಗುರೊಡೆದು ಸಿರಿ ಸಂಪತ್ತು ಸಮೃದ್ಧಿ ಆಗಲಿ”ಪಂದ್. “ಲಕ್ಕ್ ಸಿರಿ” ಸಬ್ದೊನು ಬೊಕ್ಕದ ಕಾಲೊಡು “ಲೆಕ್ಕಸಿರಿ” “ಲೆಕ್ಕೆಸಿರಿ” ಪಂದ್ ಲೆತ್ತೆರ್. ಮುಲ್ಪ “ಕೃಷಿ”ನ್ ಬೂತದ ರೂಪೊಡು ಕಲ್ಲ್ ಪಾಡ್ದ್ ನಂಬೊಂದು ಬತ್ತೆರ್.ಎಡ್ಡೆ ಬುಲೆ ಬರೊಡು ಪಂದ್ ಕಲ್ಲುಗು ತಂಬಿಲ, ಪನಿಯಾರ ಪಾಡೊಂದು ಬತ್ತೆರ್. ಕೋಲ ಕೊರಿಯೆರ್.ನಿಸರ್ಗದ ರಾಜೆ ಪಂದ್ ಪಂಡೆರ್.
ಗುಲಿಗೆ, ಪಂಜುರ್ಲಿ, ಜುಮಾದಿ, ಮೈಸೈಂದಾಯೆ ಉಂದು ನರಮಾನಿ ಪುದರ್ ಅತ್ತ್.ಅಕುಲು ಅಕ್ಲೆನ ಕಲೆನ್ ಬೇತೆಕ್ಲೇಗ್ಲಾ ಕಲ್ಪದೆರ್.ಅಕ್ಲೆನ ಕಲೆ ಪವಾಡ ಸಾಹಸೊಲೆಗ್ ಆನಿದ ಜನಕುಲು ಗೌರವ ಕೊರ್ದು ಮಾನದಿಗೆ ಮಲ್ದೆರ್. ಅಕುಲು ಸೈತಿ ಬೊಕ್ಕ ಅಕ್ಲೆನ ನೆಂಪುಗು ಅಕ್ಲೆನ ಕಲೆತ್ತ ಪುದರ್ಡೇ ಲೆಕ್ಕೆಸಿರಿ ಕಲ್ಲ್ ಡೇ ಅಲ್ಪ ಅಲ್ಪ ಕಲ್ಲ್ ಪಾಡ್ದ್ ಬೂತೊಲೆನ ಪಡೆಕಲ್ಲ್ ಪಂದ್ ಲೆಪ್ಪುವೆರ್. ಕರೆ ಕೂಡ್ದು ಪಂಡ ಕ್ಷೇತ್ರಿಯವಾದ್ ಒಂಜೇ ಒಂಜೇ ಕಲ್ಲ್ ಡ್ ನಂಬುವೆರ್.ಅಲ್ಪ ದೊಂಪ ಪಾಡ್ದ್ ಈ ಐವೆರ್ ಬೂತೊಲೆಗ್ ಒಂಜೇ ಕಲ್ಲುಡು ತಂಬಿಲ ಪನಿಯಾರ ಕೋಲ ಕೊರೊಂದು ಬತ್ತೆರ್.ಪಿಲಿ ಪಂಜಿಲೆನ ಆತ್ಮೊಲೆಗ್ ಕೊರಿ ಕಡ್ತ್ ಬಲಿ ಕೊರಿಯೆರ್. ದೊಂಪದ ಬಲಿ ಪಂಡೆರ್. ಬೂತೊಲೆನ ಪಡೆ (ಸಮೂಹ)ಕಲ್ಲ್ ಪಂಡೆರ್.ಪಂಡ ಒಂಜೇ ಕಲ್ಲ್ ಡ್ ಐವೆರ್ ಬೂತೊಲು.ಕರೆ ಕರೆ ಕೂಡುದು ಆರಾದನೆ ಮಲ್ತೊಂದು ಬತ್ತೆರ್.ಈ ಕಾಲ ಮೂಲ ವಾಸಿಲು ಮಾತ್ರ ಇಪ್ಪುನ ಕಾಲ ಆದ್ ಇತ್ತ್ಂಡ್.
ಇಂಚಾ ಇಪ್ಪುನಗ ತುಲುನಾಡುಗು ಬೇತೆ ಬೇತೆ ದರ್ಮದ ಜನಕುಲು ಬರ್ಪೆರ್. ತುಲುನಾಡ್ಡ್ ಇತ್ತಿನ ಮಾತ ಪಟ್ಲ ಜಾಗೊಡು ಕಂಡೊಲೆನ್ ಮಲ್ಪುವೆರ್. ಕಂಡೊಲೆನ್ ಗುತ್ತಿಗೆಗ್ ಕೊರ್ದು ಗುತ್ತುದಕುಲು ಆಪೆರ್.ತುಂಡು ಅರಸೆರ್ ಆಪೆರ್. ಅಕ್ಲೆನ್ಲಾ ಬೂತೊ ಆದ್ ನಂಬುವೆರ್. ಮಾತಾ ಜಾತಿದಕ್ಲೆನ ಕಲೆ ಕಸುಬು ಜನಕ್ಲೆಗ್ಲಾ ಗೌರವ ತಿಕ್ಕುಂಡು. ಅಕುಲೆನ್ ಊರುದ ಪುದರ್ಡೇ ,ಅಕುಲೆನ ಕೆಲಸ ಕಲೆತ್ತ ಪುದರ್ಡೇ ಬೂತಗ್ ಪುದರ್ ದೀಪೆರ್. ತುಲುನಾಡ್ಡ್ ದೇವೆರೆನ ಆರಾದನೆ ಸುರು ಆಯಿ ಬೊಕ್ಕ ನಂಬೊಂದು ಬತ್ತಿನ ಬೂತೊಲೆಗ್ ಅಕುಲೆನ ಪುದರ್ಡೇ ಲೆತ್ತೆರ್.ಅಕುಲು ಪಂಡ ಕೋಟಿ ಚೆನ್ನಯ ,ಕಾಂತ ಬಾರೆ-ಬೂದ ಬಾರೆ,ಕೊರಗಜ್ಜಾ, ಸಿರಿ, ಕುಮಾರೆ,ಕೋರ್ದಬ್ಬು ಇಂಚ.
ಮುಲ್ಪದ ಬೂತೊಲೆನ ಪಡೆಕಲ್ಲುಡು ಬೊಕ್ಕದ ಕಾಲೊಡು ಬತ್ತಿನಕುಲು ಅಕುಲೆನ ಬೂತೊಲೆನ್ ಆ ಪಡೆಕಲ್ಲುಡೇ ನಂಬರೆ ಆಸೆ ಮಲ್ಪುವೆರ್.ಆಂಡ ಅಕುಲೆಗ್ ಅಲ್ಪ ಕೋರಿ ಕುದುಪರೆ ಹಿಂಸೆ ಮಲ್ಪರೆ ಅಕ್ಲೆನ ದರ್ಮ ಕೇನುಜಿ.ಅಕುಲು ಮುಲ್ಪದ ಮೂಲ ನಿವಾಸಿಲೆಡ “ಎಂಕುಲು ಎಂಕುಲೆನ ಬೂತೊಲೆನ್ಲಾ ನಿಕ್ಲೆನ ಪಡೆಕಲ್ಲುಡು ನಂಬುವ.ನಿಕ್ಲೆನ ಎಂಕ್ಲೆನ ಬೂತೊಲೆನ್ ಒಟ್ಟುಗು ಆರಾದನೆ ಮಲ್ಪುಗ.ಕೊರಿ ಬಲಿ ಕೊರ್ಪುನ ಬದಲ್ ಉಚ್ಚಯದ ಬಲಿ ಕೊರುಕ್ಕ.ನಿಕ್ಲೆಗ್ ಕೋರಿ ಬಲಿ ಕೊರೊಡ್ಡ ನಿಕ್ಲೆನ ಬೂತೊಲೆನ್ ನಿಕ್ಲೆನ ಇಲ್ಲಡ್ ಅತ್ತುಡ ನಾಗನ್ ನಂಬಿನ ಆದಿ ಕುಟುಮದ ಇಲ್ಲಡ್ ನಂಬುಲೆ “ಪಂದ್ ಕೇನುವೆರ್.ಮೂಲ ನಿವಾಸಿ ಜನಕುಲು ಐಕ್ ಒಪ್ಪಿಗೆ ಕೊರ್ಪೆರ್.ಅಂಚ ಮೂಲ ಜನಕುಲು ಪಡೆಕಲ್ಲುಡು ಬೊಕ್ಕ ಅಕ್ಲೆನ ಇಲ್ಲಡ್ಲಾ ಬೂತೊಲೆನ್ ನಂಬುವೆರ್. ಬೊಕ್ಕದ ಕಾಲೊಡು ಬತ್ತಿನ ದರ್ಮದ ಜನಕುಲು ಅಕ್ಲೆನ ಬೂತೊಲೆನ್ಲಾ ಬೊಕ್ಕ ಮುಲ್ಪದ ಆದಿದ ಐವೆರ್ ಬೂತೊಲೆನ್ಲಾ ಅಕ್ಲೆನ ಇಲ್ಲಡ್ ತಾಪನೆ ಮಲ್ಪುವೆರ್.ಒಂಜಿ ಊರುಡು ಕರೆ ಕರೆ ಕೂಡುದು ಬೂತೊಲೆ ಪಡೆಕಲ್ಲುಡು ದೊಂಪ ಪಾಡ್ದ್ ದೊಂಪದ ಬಲಿ ಉಚ್ಚಯ ನಡತೊಂದು ಇಪ್ಪುಂಡು.
ಊರುಡು ಕರೆ ಕರೆ ಕೂಡುದು ದೊಂಪದ ಉಚ್ಚಯದ ಬದಲ್ ಒಂಜೇ ಕೋಡಿಡ್ ಆಯನ ನೇಮ ಮಲ್ತುಂಡ ಎಡ್ಡೆ ಪನ್ಪಿನ ಇಸಯೊನು ಆನಿದ ತುಂಡರಸೆರ್ ಮುಲ್ಪದ ಮೂಲ ನಿವಾಸಿಲೆಡ ಕೇನುವೆರ್. ಐಕ್ ಅಕುಲು ಒಪ್ಪಿಗೆ ಕೊರ್ಪೆರ್.ಅಂಚ ಊರ ನಡುಟ್ಟು ಗುಂಡ ಸಾನ ಗರಡಿ ಕಟ್ಟೆ ಕಟ್ಟುದು ಊರ್ದ ಕರೆ ಕರೆಟ್ಟ್ ಇತ್ತಿನ ಬೂತೊಲೆ ಪಡೆಕಲ್ಲುಲೆಡ್ದ್ ಬೂತೊಲೆನ್ ಕಂತ್ ತಾಪನೆ ಮಲ್ತೆರ್.
ಊರುದ ಆಯನ(ಅವನ-ತುಂಡರಸರನ್ನು ದೈವ ಆಗಿ ನಂಬಿರುವುದು)ನೇಮ(ಸ್ಮರಣೆ)ಆಪುನ ದುಂಬು ಮೂಲದ ಬೂತೊಲೆ ಪಡೆ ಕಲ್ಲುದಲ್ಪ ಒಂಜಿ ಕಡೆಟ್ಟ್ ಆನಿದ ನೆಂಪುಗು ದೊಂಪ ಪಾಡ್ದ್ ಉಚ್ಚಯ ಮಲ್ತುದು ಆಯಿ ಬೊಕ್ಕ ಊರುದ ಆಯನ ನೇಮ ಆಚರನೆ ನಡತೊಂದು ಬತ್ತ್ಂಡ್.ಇತ್ತೆಲಾ ದೊಂಪದ ಬಲಿತಾನಿ ದೊಂಪದ ಪಿದಾಯಿ ಆನಿದ ಕೋರಿದ ಬಲಿತ್ತ ನೆಂಪುಗು ಕೋರಿ ಕಡ್ತುದು ಅಗೆಲ್ ಪಾಡುವೆರ್. ಉಂದು ಪ್ರಾನಿ ಬೂತೊಲೆಗ್ ಬೊಕ್ಕ ಮಾಸ ತಿನ್ಪುನ ಬೂತೊಲೆಗ್ ಸಂದುಡು.
ತುಲುನಾಡ್ಗ್ ಬೇತೆ ಬೇತೆ ದಮ್ಮದಕುಲು ಬರ್ಪೆರ್. ಜನಕುಲು ಎಚ್ಚಿಗೆ ಆಪೆರ್. ಬತ್ತಿನಕುಲು ಮುಲ್ತ ಬೂತೊಲೆನ್ ಕಲ್ಲ್ ಮನೆ ಪಾಡ್ದ್ ನಂಬುಗೆ ದೀದ್ ಆರಾದನೆ ಮಲ್ಪುವೆರ್.ತುಲುನಾಡ್ಡ್ ಸಾರ ಮನೆ ಬೂತೊಲು ಪಂಡೆರ್.”ಸಾರ ಮನೆ ಬೂತೊಲು” ಪಂಡ ಸಾರ ಸಾರ ಬೂತೊಲು ಉಲ್ಲ ಪಂದ್ ಅತ್ತ್.ಸಾರ ಸಾರ ಜನೊ ಸಾರ ಸಾರ ಇಲ್ಲಡ್ ಮನೆ ದೀದ್ ಬೂತೊಲೆನ್ ನಂಬಿಯೆರ್ ಪನ್ಪಿ ಅರ್ತೊ.
ಐ.ಗೋವಿಂದ ಭಂಡಾರಿ, ಕಾರ್ಲ.
( ನಿವೃತ್ತ ವಿಜಯಾಬ್ಯಾಂಕ್ ಮ್ಯಾನೇಜರ್)
